Ministri i Jashtëm i Jordanisë, Ayman Safadi, tha se krijimi i një shteti palestinez është çelësi i paqes në rajon, raporton Anadolu.

“Pa krijimin e një shteti sovran për palestinezët, Izraeli nuk do të arrijë paqen”, tha Ayman Safadi në Konferencën e Ardhmërisë së Palestinës në Ankara, duke shtuar se Izraeli sjell vetëm shkatërrim në rajon.

“Izraeli nuk kërkon paqe dhe stabilitet për vendet e rajonit, pasi shkatërroi Gazën dhe po zgjeron agresionin e tij kundër Libanit”, shtoi ai.

“Izraeli e ka humbur luftën, si politikisht, ashtu edhe moralisht”, theksoi më tej Safadi.

Kryediplomati jordanez theksoi se asnjë kamion i vetëm me ndihma nuk është lejuar në Gaza që nga 30 shtatori në mes të luftës së vazhdueshme në enklavë.

“Izraeli vazhdon të bombardojë strehimore, spitale dhe shkolla”, tha ai, duke shtuar:

“Izraeli po zgjeron kontrollin e tij mbi më shumë territore të pushtuara palestineze duke ndërtuar më shumë vendbanime. Ajo që Izraeli po bën është një krim lufte”, tha Safadi.

Tensionet rajonale janë përshkallëzuar për shkak të ofensivës brutale të Izraelit në Rripin e Gazës, ku ka vrarë rreth 42.300 njerëz, kryesisht gra dhe fëmijë, pas një sulmi të Hamasit vitin e kaluar.

Konflikti është përhapur në Liban, ku Izraeli ka nisur sulme vdekjeprurëse në të gjithë vendin, ku janë vrarë më shumë se 1.542 njerëz dhe plagosur mbi 4.555 të tjerë që nga 23 shtatori.

Pavarësisht paralajmërimeve ndërkombëtare se rajoni i Lindjes së Mesme ishte në prag të një lufte rajonale mes sulmeve të pamëshirshme të Izraelit në Gaza dhe Liban, Tel Avivi e zgjeroi konfliktin duke nisur më 1 tetor një pushtim tokësor në Libanin jugor.