KEK ME DARDHA

4-5 kokrra dardha
3 filxhanë miell që fryhet vetë
1 e ½ filxhanë sheqer
3-4 kokrra vezë
150 gr gjalpë bimor
2-3 lgj kakao
100 gr çokollatë
1 gotë qumësht
1 bustinë vanilje
1 bustinë pluhur pjekës

Fillimisht shkrijmë çokollatën dhe gjalpin në banjomari. Ndërkohë rrahim vezët së bashku me sheqerin dhe me qumështin. Përziejmë miellin me kakaon, me vaniljen dhe me pluhurin pjekës. Dy dardhat i presim në feta, ndërsa dy të tjerat i presim në kubikë. Më pas bashkojmë të gjithë përbërësit në një enë të vetme duke i trazuar mirë.

E vendosim brumin e kekut në një tavë (me formë nëse kemi) duke e niveluar mirë. Në të gjithë sipërfaqen e kekut vendosim rradhë-rradhë fetëzat e dardhës. E vendosim kekun me dardha të piqet në temperaturën 180 gradë Celsius për 45-50 minuta.

ÇORBE SHKODRANE

400 gr mish të grirë
2 filxhanë oriz
5 filxhanë lëng mishi
1 kokërr qepë
½ lgj salcë domate
3-4 lgj vaj
Kripë, piper
Gjethe dafine

Kaurdisim fillimisht qepën derisa të zbutet duke e ndihmuar dhe me pak kripë. Sapo qepa të bëhet transparente shtojmë mishin e grirë dhe e kaurdisim mirë derisa të përthithë lagështirën e vet. Më pas shtojmë salcën e domates dhe pas 2-3 minutash hedhim lëngun e mishit dhe e lemë mishin e grirë të ziejë për rreth 10 minuta. Tek masa e përgatitur shtojmë dhe gjethen e dafinës, kripë dhe piper.

Në fudn shtojmë orizin dhe e lemë derisa orizi të ziejë në formë rizotoje. E lemë të ftohet pak dhe e servirim të ngrohtë.

PAÇE DIBRANE

3 lgj miell misri
2 lgj gjalpë
3 gota lëng mishi
1 vezë
2-3 thelpinj hudhër
2-3 lgj uthull
Kripë, piper

Fillimisht kaurdisim miellin e misrit me gjalpë duke e trazuar me lugë druri. E lemë miellin të kaurdiset mirë derisa të marrë pak ngjyrë dhe më pas shtojmë lëngun e mishit. Nëse nuk kemi lëng mishi mund të bëjmë një buljon me koncentrat. Vazhdojmë trazimin derisa lëngu të fillojë të lidhet.

Në një blender vendosim 1 kokërr vezë, 2-3 thelpinj hudhër dhe 2-3 lugë uthull dhe realizojmë një salcë të cilën e shtojmë tek gatimi. E lemë paçen dibrane në zjarr dhe për 2-3 minuta dhe më pas e servirim të nxehtë.