Ann Uilson, këngëtarja kryesore e grupit Rock Heart, thotë se ajo ka kancer dhe grupi po shtyn shfaqjet e mbetura në turneun e tij Royal Flush, derisa ajo i nënshtrohet trajtimit.
Uilson tha në një deklaratë të martën se ajo iu nënshtrua një operacioni për të hequr një tumor kanceroz dhe po shërohet në mënyrë të qëndrueshme, por mjekët e saj i kërkuan asaj që t’i nënshtrohej kimioterapisë parandaluese dhe të pushonte aktivitetet e saj, “në mënyrë që të shërohej plotësisht”. Kjo do të thoshte se pjesa tjetër e shfaqjeve në turneun e Amerikës së Veriut do të shtyhet për në vitin 2025.
“Për blerësit e biletave, me të vërtetë dëshiroj që ne të mund t’i bëjmë këto koncerte. Ju lutemi ta dini se unë absolutisht planifikoj të rikthehem në skenë në vitin 2025″, tha Uilson në deklaratë. “Ekipi im po i rregullon ato detaje dhe ne do t’ju njoftojmë planin sa më shpejt që të mundemi.”
Të gjitha biletat e blera më parë për shfaqjet tashmë të shtyra do të ndërrohen. Datat e riplanifikuara do të shpallen në javët në vijim, sipas njoftimit.
“Kjo është thjesht një pauzë. Unë kam për të kënduar shumë më tepër “, vazhdoi Uilson në deklaratën përpara se të shtonte, “Me respekt, kjo është deklarata e fundit publike që do të doja të bëja për këtë çështje.”.
