Danimarka ka vendosur të vazhdojë kontrollet në kufirin me Gjermaninë për edhe gjashtë muaj të tjerë, për shkak të një rreziku të vazhdueshëm nga terrorizmi. Lajmi u bë i ditur nga Ministria daneze e Drejtësisë.

Sipas ministrisë, ky rrezik lidhet me grupe radikale islamike dhe ka si burim konfliktin e tanishëm në Lindjen e Mesme.

Ministri i Drejtësisë, Peter Hummelgaard, tha se situata është serioze dhe se vendi duhet të jetë i kujdesshëm në lidhje me personat që lejohen të kalojnë kufijtë. Sipas tij, kontrollet janë një mënyrë për të ndihmuar autoritetet në parandalimin e terrorizmit dhe krimit që ndodh përtej kufirit.

Kontrollet kufitare janë vendosur për herë të parë në vitin 2016, kur shpërtheu kriza e refugjatëve. Që atëherë, ato janë shtyrë disa herë, për arsye të ndryshme. Në disa raste masat janë lehtësuar, ndërsa në periudha të tjera janë forcuar.

Në muajin prill të vitit 2023, vëmendja u drejtua më shumë nga parandalimi i krimit, me prezencën e policisë të përqendruar edhe brenda vendit dhe jo vetëm në kufi.

Sipas Ministrisë së Drejtësisë, kjo strategji ka ndihmuar në përmirësimin e luftës kundër krimit që ndodh ndërmjet vendeve.