Kievi thotë se ligji ndërkombëtar u godit rëndë nga fakti se Mongolia nuk arrestoi Vladimir Putin, ashtu sikundër përcaktohet në një urdhër ndërkombëtar për arrestimin e Presidentit rus, pas luftës së nisur në Ukrainë.
Vladimir Putin po viziton Mongolinë pa asnjë shenjë se vendi pritës do të përkulet ndaj thirrjeve për ta arrestuar atë me një urdhër ndërkombëtar për krime të dyshuara lufte që rrjedhin nga pushtimi i Ukrainës.
Dështimi i Mongolisë për të arrestuar Putinin i dha një “goditje të rëndë” sistemit të së drejtës penale ndërkombëtare, tha Ministria e Jashtme e Ukrainës ndërsa presidenti rus mbërriti për bisedime që ka të ngjarë të përqëndrohet në një tubacion të ri gazi që lidh Rusinë dhe Kinën.
Zëdhënësi i Ministrisë së Jashtme të Ukrainës, Heorhiy Tykhyi, tha: “Mongolia ka lejuar një kriminel të akuzuar t’i shmanget drejtësisë, duke ndarë kështu përgjegjësinë për krimet e luftës”.
Ky ishte udhëtimi i pari i Putinit në një vend anëtar të Gjykatës Ndërkombëtare Penale që kur ajo lëshoi një urdhër arresti rreth 18 muaj më parë. Përpara vizitës së tij, Ukraina i bëri thirrje Mongolisë që t’ia dorëzonte Putinin gjykatës në Hagë dhe Bashkimi Evropian shprehu shqetësimin se Mongolia mund të mos ekzekutonte urdhrin.
Anëtarët e gjykatës ndërkombëtare janë të detyruar të arrestojnë të dyshuarit nëse është lëshuar një urdhër arresti, por Mongolia është një vend pa dalje në det, shumë i varur nga Rusia për karburant dhe një pjesë të energjisë elektrike të saj. Gjykata nuk ka një mekanizëm për të zbatuar urdhërat e saj.
Gjykata Ndërkombëtare Penale ka akuzuar Putinin si përgjegjës për rrëmbimet e fëmijëve nga Ukraina. Të hënën, Bashkimi Evropian shprehu shqetësimin se urdhri i Gjykatës Penale Ndërkombëtare mund të mos ekzekutohej dhe tha se e kishte ndarë shqetësimin e tij me autoritetet mongole.
