Kina i kërkoi SHBA-së që t’i japë fund kufizimeve të saj ndaj Kubës dhe të heqë Havanën nga lista e “shtetërve sponsorizues të terrorizmit”.
Akuzat për “punë të detyruar” janë bërë “një justifikim dhe një mjet” për SHBA-në për të “ndrydhur zërat kundërshtues”, tha zëdhënësja e Ministrisë së Jashtme kineze Mao Ning në një konferencë shtypi në Pekin, duke shprehur kundërshtimin e Kinës ndaj “diplomacisë shtrënguese”.
SHBA zgjeroi kufizimet e vizave kundër Kubës më 25 shkurt, duke cituar shërbimet mjekësore të Kubës jashtë shtetit si të dyshuar për “punë të detyruar të lidhur me programin kuban të eksportit të punës”.
“Programet e eksportit të fuqisë punëtore të Kubës, të cilat përfshijnë misionet mjekësore, pasurojnë regjimin kuban dhe në rastin e misioneve mjekësore të Kubës jashtë shtetit, u privojnë kubanezët e zakonshëm nga kujdesi mjekësor për të cilin ata kanë nevojë dëshpërimisht në vendin e tyre”, thuhej në një deklaratë të sekretarit amerikan të shtetit në atë kohë.
Ning tha se masat e reja të marra nga SHBA “përfaqësojnë një vazhdim dhe intensifikim të bllokadës dhe sanksioneve gjashtë dekadash kundër Kubës”.
Zëdhënësja i kërkoi gjithashtu Uashingtonit të ndërmarrë veprime konkrete për të përmirësuar marrëdhëniet SHBA-Kubë dhe sinqerisht të kontribuojë në zhvillimin e kombeve të Karaibeve.
Ning vuri në dukje se Kuba ka dërguar më shumë se 600,000 profesionistë mjekësorë në mbi 60 vende në mbarë botën gjatë gjashtë dekadave të fundit, duke ofruar shërbime mjekësore për mbi 230 milionë njerëz dhe potencialisht duke shpëtuar më shumë se 12 milionë jetë.
Ajo shtoi: “Bashkëpunimi mjekësor jashtë shtetit të Kubës është mirëpritur gjerësisht nga qeveritë dhe popujt e Karaibeve.”
(A.A/BalkanWeb)
