TIRANË

Komisioni Qendror i Zgjedhjeve i ka bërë apel partive politike që të dorëzojnë brenda ditës së sotme kandidaturat për komisionerë të nivelit të dytë.


Përmes zëdhënëses, Drilona Hoxha, KQZ shprehet se mosrespektimi i afateve ligjore cenon procesin zgjedhor si dhe tregon një mungesë të qartë papërgjegjshmërie  nga partitë politike.


“Data 18 Mars shënon afatin përfundimtar për depozitimin e propozimeve për KZAZ-të. Deri tani asnjë nga partitë politike që e gëzojnë këtë të drejtë, nuk ka sjellë pranë KQZ-së propozime për komisionerë të nivelit të dytë. Komisioni Qendror i Zgjedhjeve i bën apel partive politike që kanë të drejtën të propozojnë anëtarë të KZAZ-ve që të respektojnë afatin ligjor për depozitimin e kandidaturave në KQZ.


KQZ këkon që partitë politike të mos neglizhojnë respektimin e afateve ligjore për paraqitjen e propozimeve për administratën zgjedhore, sikundër ka ndodhur në çdo proces zgjedhor. Mos respektimi i afatit ligjor tregon mungesë përgjegjshmërie në përmbushjen e detyrimeve që ju ngarkon Kodi Zgjedhor.

KQZ-ja është e vendosur të mos mirëkuptojë dhe as tolerojë vonesat në propozime, ndaj kërkon që partitë politike të depozitojnë urgjent propozimet e tyre për anëtarë të KZAZ-ve, brenda ditës së sotme dhe të mos bëhen shkak për cënimin e administrimit të procesit zgjedhor. Administrata zgjedhore duhet të trajnohet dhe kualifikohet për kryerjen e detyrave. Vonesat në propozime cenojnë përgatitjen profesionale të komisionerëve, rrezikojnë mbarëvajtjen e procesit, dëmtojnë cilësinë e zgjedhjeve”, tha Hoxha.

Edhe pse zgjedhjet lokale janë dekretuar nga Presidenti i i Republikës me  30 qershor, situata politike në vend vijon të karakterizohet nga tensionet. Opozita e bashkuar pas djegies së mandateve kërkon mbajtjen e zgjedhje të parakohshme si dhe krijimin e një qeverie tranzitore pa Edi Ramën kryeministër.

Ky i fundit ka theksuar se gjithçka mund të preket, por vetëm qeveria jo. Shefi i qeverisë pohoi ditë më parë nga Berati se mandati i qeverisjes është një kontratë që i është dhënë nga vota qytetare me afat deri në 2021.

(n.m/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb