Kryeministri i Sri Lankës i tha BBC-së se nuk ka qenë i informuar për paralajmërimet e inteligjencës, përpara sulmeve të 21 prillit. Ranil Wickremesinghe tha se informacionet për çdo rrezik potencial nuk janë kaluar tek ai.

Sulmet në disa kisha dhe hotele të Shri Lankës lanë së paku 250 njerëz të vrarë, përcjell REL.  Autoritetet pranuan se ato mund të ishin shmangur sikur informacionet e inteligjencës “t’iu ishin dhënë njerëzve të duhur”.

“Ka pasur hendek midis inteligjencës dhe qeverisë. E kemi marrë përgjegjësinë, sepse, sikur informacionet e inteligjencës t’iu jepeshin njerëzve të duhur, sulmet do të mund të shmangeshin ose të minimizoheshin”, tha zëvendësministri i Mbrojtjes i Shri Lankës, Ruwan Wijewardene.

Shefi i policisë dhe një zyrtar i lartë i Ministrisë së Mbrojtjes dhanë dorëheqje pas sulmeve. Wickremesinghe tha se nuk jep dorëheqje për faktin se nuk ka qenë i njoftuar me paralajmërimet. “Sikur të kishim ide dhe nuk do të kishim marrë masa, do të jepja dorëheqje menjëherë”, tha ai.

Autoritetet në Shri Lankë fajësuan grupin islamist lokal National Tawheed Jamath për sulmet.

BalkanWeb