SERBI– Presidenti i Serbisë, Aleksandar Vuçiç thotë se NATO e ka paralajmëruar atë kundër ndërhyrjes së ushtrisë serbe në Kosovë.

“Disa herë kam marrë këtë paralajmërim për të mos përdorur fjalë më të rëndë: Nëse përpiqeni të hyni me ushtrinë tuaj, me policinë tuaj në Kosovë, në çfarëdo mënyre, NATO do ta trajtonte këtë si akt armiqësor dhe do të ishit në konflikt me aleancën më të fuqishme në botë”, tha Vuçiç.

Ai po ashtu tha se nuk është optimist për bisedimet me Kosovën, por tha se Beogradi nuk do të heqë dorë nga dialogu, pasi atë e sheh si “të vetmen zgjidhje drejt kompromisit”.

“Para nesh janë bisedimet në Bruksel. Nuk jam optimist, por serbët do të bëjnë përpjekje që të arrihet deri te kompromisi”, u tha Vuçiç gazetarëve në Akademinë e Shkencave dhe Arteve të Serbisë.

Vuçiç shprehu shqetësim për sulmet e shpeshta ndaj serbëve në Kosovë në ditët e fundit, sipas tij, dhe shtoi se kjo është “fushatë për frikësimin e popullatës lokale serbe”.

“Deri tani kemi arritur të ruajmë paqen dhe qëndrueshmërinë, por kjo po bëhet gjithnjë e më e vështirë sepse shqiptarët po bëhen gjithnjë e më nervozë”, tha Vuçiç.

(BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb