Kryetarja e Lidhjes Demokratike të Gruas, Vokshi, ka theksuar nevojën për të fuqizuar gratë në jetën politike dhe shoqërore të vendit. Gjatë fjalës së saj në konferencën “Fuqia e Grave në Politikë”, e cila u zhvillua me pjesëmarrjen e kreut të Partisë Demokratike, Sali Berisha, ajo nënvizoi se gratë janë motorët e ndryshimit në familje, shoqëri dhe politikë, dhe se është koha t’u jepet zë atyre që nuk kanë mundësi të dëgjohen.
Vokshi theksoi se sot gratë po shantazhohen, kërcënohen dhe dhunohen nga patronazhistët e pushtetit në këmbim të votës. Ajo bëri thirrje që ato të mos dorëzohen përballë këtyre presioneve, duke u kërkuar të mobilizohen për të bërë ndryshimin e nevojshëm më 11 maj, për një Shqipëri më të madhe dhe më të fortë.
Ajo gjithashtu theksoi se Partia Demokratike ka politika të qarta për gratë dhe fuqizimin e tyre, të cilat u prezantuan në Ditën e Gruas më 8 mars, dhe që do të vihet në zbatim pas 11 majit.
“Kjo është Evropa këtu duam të shkojmë, jo si ata që bredhin me pasaportë evropiane pas 12 vitesh dështime. Gratë janë motrrët e ndryshimit në familje, shoqëri e politike. T’u japim zë grave të pazëshme, të flasim për nënat që punojnë në dy punë për të siguruar fëmijët. Për nënat që çojnë fëmijët në shkollë e s’u kthehen kurrë pasi u vriten në shkolla, të grave që vuajnë nga kanceri por që s’marrin mjekime, se paratë i shkojnë koncensionarit, mikut të kryeministrit. Në emër të nënave që po terrorizohen nga patronazhistët në pushtet për t’i kërcënuar me votën.
Sot ka shpresë dhe kjo shpresë janë gratë. Rama i përdor gratë për numra e statistika, do t’u japim grave emër e forcë. Na duhen programe të qëndrueshme për t’u zhvilluar, për të mbështetur gratë me politika mbështetëse, edhe për ata që rrinë në shtëpi. Politika për çiftet e reja, dhe jky është program që kemi paraqitur më 8 mars, dhe pas 11 majit do ta bëjmë realitet. Ndryshimin e kemi ne përmes votës. Në pak ditë vota juaj është shantazhuar e dhunuar, blerë, mund të bëni ndryshimi. Rezistoni para shantazhit e dhunës së patronazhistëve, parave që blejnë votën tuaj”, tha ajo.
