TIRANË
Policia e Tiranës ka arrestuar një person, i cili ishte shpallur në kërkim ndërkombëtar për përdhunim, rrëmbim dhe vepra të tjera penale. Gazetarja e “BalkanWeb”, Dorjana Bezat raporton se shtetasi i arrestuar është Erind Bicerri. Ai u vu në pranga nga policia në rrugën ”Arkitekt Sinani”, në kryeqytet.
Gjykata e Apelit në Milano e ka dënuar këtë shtetas me 7 vjet burg për kryerjen e veprave penale “Marrëdhënie seksuale me dhunë”, “Rrëmbim” dhe vepra të tjera. Interpol Tirana në bashkëpunim me Interpol Romën kanë filluar menjëherë punën për ekstradimin e tij drejt Italisë.
NJOFTIMI I POLICISE:
Operacioni nga Drejtoria Vendore e Policisë Tiranë, Departamenti i Policisë Kriminale dhe Interpol Tirana. Në vijim të punës për kapjen e personave në kërkim kombëtar e ndërkombëtar, Sektori i Forcës së Posaçme Operacioneve Speciale dhe Kërkimit, në Drejtorinë Vendore të Policisë Tiranë, në bashkëpunim me Departamentin e Policisë Kriminale dhe Interpol Tirana, zhvilloi një operacion për kapjen e një të kërkuari nga drejtësia italiane, si rezultat i të cilit, në rrugën ”Arkitekt Sinani”, Tiranë, u bë e mundur kapja e 30-vjeçarit E.B., banues në Tiranë.
Arrestimi i përkohshëm i tij u krye pasi shtetasi E. B. ishte person i shpallur në kërkim ndërkombëtar nga Interpol Roma. Gjykata e Apelit Milano/ Itali e ka dënuar këtë shtetas me 7 vjet burg për kryerjen e veprave penale “Marrëdhënie seksuale me dhunë”, “Rrëmbim” dhe vepra të tjera. Interpol Tirana në bashkëpunim me Interpol Romën vijojnë punën për ekstradimin e tij drejt Italisë.
