I shumëkërkuari i drejtësisë, Ergys Agasi është arrestuar nga forca operacionale pasditen e sotme.
Siç raportohet nga gazetarja Klodiana Lala, Agasi ka rënë në pranga në qytetin e Durrësit, në zonën e Plepave.
Sakaq, rrethanat e prangosjes së tij mbeten ende të paqarta dhe priten të zbulohen në vijim.
Kush është Ergys Agasi?
Ergys Agasi është një emër i njohur në hapësirën publike, i lakuar gjatë viteve të fundit si në debatin politik, ashtu edhe në raportimet investigative mbi krimin e organizuar dhe korrupsionin e nivelit të lartë.
Emri i tij ka qenë në qendër të akuzave të përsëritura nga politika në vend, e cila e ka cilësuar si një personazh me ndikim të fortë prapaskene në vendimmarrje politike, emërime administrative dhe lidhje me pushtetin e mazhorancës.
Në kuadër të hetimeve të nisura nga SPAK për dosje të bujshme të korrupsionit, pastrimit të parave dhe pastrimit të produkteve të veprës penale, Agasi ishte shpallur në kërkim zyrtar pasi më parë ndaj tij ishin ushtruar kontrolle banese dhe sekuestro pasurish.
NJOFTIMI I POLICISE
Finalizohet operacioni policor i koduar “The Wanted”
Drejtoria Vendore e Policisë Durrës dhe strukturat operacionale të Drejtorisë së Përgjithshme të Policisë së Shtetit, në bashkëpunim me Prokurorinë e Posaçme kundër Korrupsionit dhe Krimit të Organizuar (SPAK), finalizuan operacionin e koduar “The Wanted”. Si rezultat i operacionit, në Durrës u kap shtetasi E. A., i shpallur në kërkim nga SPAK-u. Në kuadër të operacionit, u kap dhe u arrestua edhe shtetasi U. Sh., i cili udhëtonte në të njëjtin automjet me personin e kërkuar E. A.
