Pasi Prokuroria e Posaçme tha se kreu i grupit parlamentar të Partisë Demokratike, Gazment Bardhi nuk kishte bërë kallëzim ndaj Olsi Ramës, reagoi kryeministri, duke theksuar se kallëzimi i është shitur si sapuni për djathë emisionit investigativ italian.
Përmes një postimi në rrjetin social “X”, Rama shkruan se “Bardhi dhe opozitarë të tjerë, për të shpëtuar veten, sulmojnë Shqipërinë me duart e të huajve” (duke iu referuar këtu dokumentarit të publikuar nga kanali shtetëror italian Rai 3, ku atakohet Sekretari i Përgjithshëm i Këshillit të Ministrave Engjëll Agaçi, si dhe marrëveshja e arritur me Italinë për emigrantët). Rama shtoi se ka ikur koha që Shqipëria dhe shqiptarët trajtoheshin si të ishin jetimë dhe ‘pa gojë’.
Reagimi i plotë:
“Kam bërë kallzim” po kallzim s’paska bërë thotë SPAK-u, ndërkohë që kallzimi që s’qenka bërë iu është shitur si sapun për djathë italianëve të atij emisionit të turpshëm për Shqipërinë, të cilëve letrat e kallzimit inekzistent të ulëritur në parlament u janë ofruar si akte gjyqësore!
Hajde hajde ç’vete!
Për të sulmuar Shqipërinë me duart e të huajve, ky soj shqiposh ka që në vitin 1912 që nuk le poshtërsi, sajesë, hile e gënjeshtër pa e nxjerrë jashtë kufijve të këtij vendi, po kjo historia e kallzimit të pakallzuar për t’i shpëtuar rrezikut të dënimit për kallzim të rremë është një nivel i ri pafytyrësie karshi publikut shqiptar, se palo burra që hedhin gurin e fshehin dorën ka parë plot kjo tokë, po soj burri që të ngrejë dorën sikur ka hedhur gurin, duke u hakërryer si të kishte vrarë shtatë zogj me atë gur që s’paska ekzistuar fare, nuk na kishin zënë akoma sytë!
S’duhet të jetë burrë se s’ka mundësi, është thjesht çingije që ngre dorën duke kërcyer prehër më prehër sikur ka gur për të hedhur. Po s’ka shans që kjo gënjeshtër me fustan të shkurtër të mbetet pa dalë cullak faqe shqiptarëve, siç po dalin shpejt e shpejt cullak faqe italianëve edhe gënjeshtrat që ky soj shqiposh pa atdhe ia dha autorëve të atij emisionit skandaloz, për të kthyer në Itali kohën e vdekur kur Shqipëria ishte vend i zi dhe shqiptarët ishin delet e zeza të Europës!
Ta harrojë kush e tenton, ajo kohë nuk kthehet më se Shqipërisë dhe shqiptarëve s’u drejtohet dot më askush si të ishin jetimë pa identitet e pa gojë🇦🇱
