MAL I ZI
Një varkë është përmbysur sot në liqenin e Shkodrës si pasojë e një stuhie të fuqishme, duke lënë të paktën 4 viktima. Media malazeze ‘Vijesti’ raporton se në mes të viktimave ndodhet një familje me tre anëtarë nga Zeta e Malit të Zi dhe një djalë nga Podgorica. Ndërkohë burime nga policia për ‘BalkanWeb’ bëjnë me dije se ngjarja në fjalë ka ndodhur në ujërat e liqenit të Shkodrës, të cilat administrohen nga shteti fqinj.
Sipas dëshmive paraprake, janë mbytur fillimisht një burrë e grua së bashku me vajzën e tyre dhe një djalë që u përpoq t’i shpëtonte.
Varka kishte 9 persona, 5 prej të cilëve arritën të dilnin në breg, duke i shpëtuar në këtë mënyrë tragjedisë.
Drejtori i Parkut Kombëtar të Malit të Zi, Nenad Ivanoviq, konfirmoi për “Vijesti” se momentalisht vetëm një trup është gjetur, ndërkohë po kërkohet për personat e tjerë. Departamenti i Emergjencave, përfshirë edhe një helikopter ndodhen në vendin e ngjarjes, ku po punojnë për gjetjen e personave të tjerë.
(BalkanWeb)