NGA KLODIANA LALA
TIRANE– Pas tri vitesh qëndrimi në “arrest shtëpie”, për atentatin e supozuar ndaj Tom Doshit, Durim Bami del në liri të plotë. Gjykata e Tiranës vendosi të shuajë masën e sigurisë për personazhin e shumëpërfolur, për shkak të përfundimit të afateve ligjore.
Vendimi u mor nga gjykatësi Bledar Abdullai, mbi bazën e kërkesës së bërë nga i pandehuri dhe mbrojtësi i tij.
Emri i njohur i botës së krimit, nisur nga numri i rekordeve të mëparshme kriminale, është marrë i pandehur nga prokuroria për akuzën e “kallëzimit të rremë”, kryer në bashkëpunim me deputetin socialdemokrat Tom Doshi dhe ish-deputetin Mark Frroku.
Çështja Doshi-Frroku-Bami, për të cilën do të duhej të kishte tashmë një verdikt gjyqësor, për afro tri vite u përcoll nga njëra gjykatë në tjetrën, për shkak ndryshimet ligjore të reformës në drejtësi lexoheshin ndryshe nga gjykata të ndryshme.
Në krye të herës, Gjykata e Lartë e ndërpreu shqyrtimin e çështjes dhe kërkoi mendim nga Gjykata Kushtetuese, nëse një deputet si Tom Doshi, mund të gjykohej në të njëjtin proces me ish-deputetin Mark Frroku.
Kushtetuesja vendosi t’i hapë dritën jeshile Gjykatës së Lartë, për t’i gjykuar bashkë tre të pandehurit, e në këto kushte çështja mbërriti sërish në Gjykatën Supreme.
Pasi mbeti pezull për një kohë të gjatë, për shkak të dorëheqjes së gjykatësve, procesi rinisi pranverën e 2017. Kolegji Penal asokohe pranoi kërkesën e prokurorisë për të thirrur si dëshmitarë të gjithë krerët e shtetit shqiptar.
Por duke qenë se në muajin gusht të vitit të kaluar, se hyri në fuqi Kodi i ri i Procedurës Penale, çështja “Doshi” kaloi nga gjykata e Lartë tek ajo për Krime të Rënda, por kjo e fundit shpalli moskompetencën dhe e ktheu dosjen sërish atje nga erdhi.
Pas një odiseje të gjatë, një muaj më parë dosja mbërriti në Gjykatën e Tiranës.
Seanca e parë është caktuar të zhvillohet me 15 maj dhe shorti ka përcaktuar gjykatësin Bledar Abdullai për shqyrtimin e saj.
Nisja e procesit pritet me mjaft interes pas zhvillimeve të fundit, kur Departamenti Amerikan i Shtetit vendosi të shpallë non grata deputetin Tom Doshi. Ky i fundit, akuzohet se në bashkëpunim me ish-mikun e tij Marrk Froku e Durim Bamin, sajuan një skenar për vrasje, me qëllim krijimin e rrethanave për nisjen e një hetimit ndaj ish-kryeparlamentarit Ilir Meta.
(d.d/BalkanWeb)