TIRANE- Deputeti Ylli Shehu ka komentuar largimin e tij nga Partia Republikane dhe bashkimin me grupin parlamentar të Lëvizjes Socialiste për Integrimin. Duke shpjeguar arsyet e kësaj lëvizje, Shehu thotë se ka bërë një “zgjedhje politike të motivuar”, ndërsa shton se “Fatmir Mediu nuk ka mbajtur premtimet e bëra”.

Sipas deputetit Shehu, kreu i PR nuk dha asnjë shpjegim për mos kandidimin për Bashkinë e Durrësit të Agron Dukës, i cili sipas tij do të kishte qenë fitues në këto zgjedhje lokale.

Ja deklarata e plotë e deputetit Ylli Shehu

Me keqardhje u njoha me qëndrimet e mbajtura nga z.Mediu ndaj vendimit tim për t`iu bashkuar grupit parlamentar të LSI.
Desha të sqaroj qartë edhe një herë, se nuk kam ikur por kam bërë një zgjedhje, e cila ka qenë thellësisht e motivuar dhe parimore, pasi për fat të keq Z.Mediu i iku në mënyrë krejtësisht jo transparente premtimit publik të bërë në strukturat drejtuese të Partisë Republikane, që nëse Partia Demokratike nuk do t’i qëndronte angazhimit për të kandiduar z.Agron Duka për kryetar të bashkisë së Durrësit atëherë Partia Republikane për të vënë në vend dinjitetin e nëpërkëmbur do dilte më vete dhe do të kandidonte me kandidatët e saj në të 61 bashkitë e vendit.
Ndërkohë që Partia Demokratike nuk i qëndroi premtimit për të kandiduar z.Agron Duka në krye të bashkisë së Durrësit ku unë shpreh bindjen time se ai do të kishte qenë fitues, pa dhënë asnjë shpjegim dhe për arsye jo transparente qe vetëm ai i di, zMediu vendosi të vazhdonte koalicionin me PD sikur asgjë nuk kishte ndodhur dhe sikur asgjë nuk ishte thënë, duke i ikur në mënyrë krejtësisht jo transparente premtimit publik të bërë në strukturat drejtuese të Partisë Republikane dhe të pasqyruar gjerësisht edhe në mediat shqiptare për të dalë e vetme në zgjedhje e për të konkurruar në 61 bashkitë e vendit.
Në këto kushte i kam bërë me dije strukturave të Partisë Republikane dhe z.Mediu mospajtimin tim me këto qëndrime sa inferiore, kontradiktore dhe qesharake, duke bërë edhe zgjedhjen time politike për t`iu bashkuar grupit parlamentar të Lëvizjes Socialiste për Integrim.

(el.sp/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: