Shqipëria do të përballet me Francën të dielën në mbrëmje dhe trajneri Edi Reja ka dalë në konferencën tradicionale për shtyp kur vlerëson në maksimum kampionët e botës dhe trajnerin e tyre Didie Dëshamp. Megjithatë, ai beson se kuqezinjtë do të jenë në gjendje të godasin “gjelat” në pikat e tyre të dobëta

Ndeshja me Francën dhe formacioni?
Nuk mendoj se situacionet taktike janë deçizive. Deçiziv janë protagonistët dhe ajo që ata japin në fushë. Përsa i përket Roshit, ai luan gjithmonë në krah në majtë apo të djathtë. Për të nuk është gjë jo e natyrshme. Ne kemi shanset tona ndaj Francës dhe çdo lloj kundërshtari. Dimë se ku Franca do na vendosë në vështirësi, por dimë dhe ku ne të vëmë në vështirësi Francën. Duhet të luajmë mirë në mbrojtje dhe të shfrytëzojmë rastet që na jepen përballë tyre.

Trajner i një Kombëtareje më parë, si Deshamp?
Në radhë të parë doja t’i bëja komplimente Deshampit, që është kampion bote dhe ka fituar çmim personal si trajneri më i mirë. Unë kam punuar me klubet, është një punë tjetër, duhet të kesh dhe një raport tjetër me mediat. Është diçka stresuese. Fola me Deshampin në ndeshjen e parë me Francën, dhe më tha që është i kënaqur me punën e tij dhe më tha që nuk ka të njëjtin stres, si me Juventusin, që kërkohen rezultatet çdo javë. Më vjen keq që nuk erdha më herët që të kisha mundësi të njihja më shumë ekipin dhe të stërviteshim më mirë. Mund të merrnim rezultate më të mira me më shumë kohë, por për të ardhmen premtoj se do të ketë rezultate më të mira.

Lojtarët që mungojnë?
Kemi katër lojtarë që mungojnë. Cikalleshi, Abrashi dhe Xhaka për problemet muskulore. Por ky kontingjent lojtarësh na mundëson të kemi alternativa shumë të vlefshme për të zëvendësuar lojtarët që janë dëmtuar. Ata që do zbresin në fushë do jenë gati të përballojnë ndeshjen. Franca është ekip i fortë dhe kampion bote, por jo i pathyeshëm. Kemi planin dhe strategjinë tonë, që besoj ta shohë nesër të aplikuar në fushë.

Pse të besojmë fitoren me Francën?
Ne hyjmë në fushën e lojës për të fituar dhe për të marrë maskimumin. Ndaj Andorrës gabuam dhe nga ana psikologjike. Përveç se humbëm shumë raste, pësuam dhe dy gola që ishin të evitueshëm. Elsi tha se duhet të harrojmë këtë ndeshje, por duhet të nxjerrim mësimë. Andorra nuk shënonte në transfertë prej 9 vitesh por ne na shënoi dy gola. Ne do të luajmë kundër Francës, e cila nuk do të mbyllet në mbrojtje dhe mund te kemi disa raste, duke dalë në lojën tonë. Shpresoj të shënojmë në këto raste që do na dalin.

(Balkanweb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: