Sipas sinoptikanëve, vala e të nxehtit e pagëzuar “Lucifer”, ka filluar tërheqjen graduale nga Europa Jugore drejt brigjeve veriore të Afrikës. Meteoalb saktëson se ajo do të zhvendoset drejt juglindjes duke përfshirë Mesdheun Lindor dhe Lindjen e Mesme (vendet si Turqia, Qipro, Izraeli, Siria, Libani).
Në këto kushte, pjesa më e madhe e Evropës Jugore përfshirë Ballkanin dhe Shqipërinë, fillojnë të çlirohen nga nxehtësia e Luciferit përgjatë 10-diteshit të dytë të gushtit por sërish, jugu i Spanjës dhe Italisë si dhe pjesa më e madhe e Evropës Lindore mbeten me temperatura shumë të larta.
Pritet një riaktivizim i Luciferit në Evropën Jugore dhe Lindore në 10-diteshin e fundit të gushtit por është ende larg për të folur me saktësi mbi shtrirjen e valës Lucifer dhe vlerave termike që kjo valë do të sjellë.
Lidhur më orët në vijim, sipas Meteoalb do të vijojnë kthjellimet, por në zonat malore herë pas here do të shfaqen vranësira kalimtare, më të dukshme në verilindje-juglindje. Parashikimet janë që edhe pasditja të mbetet në të njëjtat kushte në pjesën më të madhe të vendit, përjashtuar juglindjen ku pritet fuqizim i vranësirave ku priten rrebeshe shiu afatshkurtër.
Meteoalb jep lajmin e mirë se në orët në vazhdim temperaturat e ajrit do të sjellin një rënie 1- 2 gradë C duke bërë që maksimumi në zonat malore të zbresë në 30 – 31 gradë C; në bregdetin e Adriatikut dhe në zonat qendrore temperatura maksimale do shënojë 35 – 36 gradë C, ndërsa territori nga lumi Shkumbin e deri në Sarandë, do të provojë maksimumin e vlerave, 37 – 38 grade C.
