Forcat e armatosura izraelite urdhëruan civilët në Rripin e Gazës që të evakuojnë urgjentisht zonat kufitare, pas një nate të bombardimeve të forta të enklavës që la të paktën 330 të vdekur.
Urdhri ka të bëjë me zona të tilla si komunitetet e Beit Hanoun (në veri), Khirbet Khuzaa, Abbasan al-Khabira dhe Abbasan al-Jadida (në jug), të cilat u përcaktuan “zona të rrezikshme luftarake” përmes X nga zëdhënësi arabishtfolës i ushtrisë izraelite, Avihai Andrai. Oficeri u bëri thirrje civilëve që “të lëvizin në pjesën perëndimore të qytetit të Gazës dhe në qytetin e Khan Younis”.
Më herët, ministri izraelit i Mbrojtjes, Yisrael Katz, tha se sulmi në Gaza do të vazhdojë derisa “të gjithë” pengjet, të gjallë dhe të vdekur, të kthehen pas sulmeve ajrore shkatërruese të natës në enklavë.
Kjo ndodh pavarësisht se një zyrtar kryesor i Hamasit deklaroi se lëvizja po “punon” në koordinim “me ndërmjetësit” në negociatat indirekte për të “ndaluar” sulmin e Izraelit.
Një zëdhënës i presidentit amerikan tha për Fox News se qeveria izraelite ishte konsultuar me Presidentin Donald Trump përpara bombardimeve të sotme.
Sulme të gjera kundër “objektivave terroriste”
Me miratimin e udhëheqjes politike, forcat e armatosura izraelite kryen “sulme të gjera” nga ajri “kundër objektivave terroriste që i përkasin organizatës terroriste Hamas në Rripin e Gazës” , njoftuan përmes Telegramit Forcat Ajrore izraelite dhe Agjencia e Sigurisë së Brendshme (Shin Bet). Numri i fundit i vdekjeve është “më shumë se 330 të vdekur, shumica e tyre fëmijë dhe gra dhe qindra të plagosur, dhjetëra prej të cilëve janë në gjendje kritike,” tha për AFP, Mohamed Zakout, një zëdhënës i Ministrisë së Shëndetësisë.
Kryeministri izraelit Benjamin Netanyahu dhe ministri i Mbrojtjes Katz urdhëruan ushtrinë të fillojë “aksione të forta kundër organizatës terroriste Hamas në Rripin e Gazës”, përmblidhet në një deklaratë nga zyra e ish-kryeministrit të lëshuar në orët e para të mëngjesit. Vendimi pasoi “refuzimin e përsëritur të Hamasit për të liruar pengjet tanë” dhe “refuzimin e tij të të gjitha propozimeve të marra nga i dërguari i posaçëm presidencial i SHBA Steve Witkoff dhe ndërmjetësit,” shtoi zyra e kryeministrit Netanyahu. “ Izraeli tani e tutje do të veprojë me vendosmëri kundër Hamasit me forcë të shtuar ushtarake”, vazhdoi deklarata nga zyra e kryeministrit Netanyahu, duke sqaruar se plani operacional iu prezantua qeverisë gjatë fundjavës dhe u miratua.
Disa orë më vonë z. Katz theksoi në një deklaratë të lëshuar se “ne nuk do të ndalemi së luftuari derisa të gjithë pengjet të kthehen në shtëpitë e tyre dhe të arrihen të gjitha objektivat e luftës”.
