Shqipëria do të aplikojë standardet europiane të kontrollit të cilësisë së barnave, me aderimin me të drejta të plota në Farmakopenë Europiane.


Ministrja e Shëndetësisë dhe Mbrojtjes Sociale, Ogerta Manastirliu tha në Komisionin e Shëndetësisë në Kuvend se zbatimi i standardeve të Farmakopesë Evropiane edhe në Shqipëri do të gatantojë standardin europian për barnat që prodhohen dhe qarkullojnë në Shqipëri.


“Në përmbushje të detyrimeve që vendi ynë ka në rrugën e anëtarësimit në familjen evropiane, standardizojmë kontrollin e barnave, për të gjitha produktet farmaceutike që prodhohen apo tregtohen në Shqipëri, duke filluar nga preparatet galenike që përgatiten në farmaci, deri te barnat citoatatike”, tha Manastirliu.


Sipas Manastirliut, Farmakopeja do të jetë “bibla” referuese për analizimin, regjistrimin, importimin dhe prodhimin e barnave.
Ministrja deklaroi se investimi që po kryhet në laboratorët e kontrollit të barnave në vend, i shërben garantimit të këtij standardi.

“Dy laboratorët e rinj që po ndërtohen dhe pajisen me aparatura moderne në Agjencinë Kombëtare të Kontrollit të Barnave dhe Pajisjeve Mjekësore do të sigurojnë zgjerimin e gamës së analizave për kontrollin e cilësisë së barnave”, tha Manastirliu.

Farmakopea Evropiane është një dokument ligjor i detyrueshëm për vendet anëtare të Bashkimit Evropian dhe përcakton në mënyrë të detajuar standardet më të larta të kontrollit të cilësisë së barnave si dhe të substancave të cilat përdoren në prodhimin e barnave dhe të gjithë produkteve farmaceutike përpara se të hidhen në treg. Antarësimi me të drejta të plota në Farmakopenë Evropiane i jep mundësi Shqipërisë të ketë për herë të parë Farmakopenë e saj, që do të jetë një standard i detyrueshëm për tu zbatuar nga të gjithë si prodhuesit dhe treguesit e barnave.

Aktualisht janë 38 shtetet anëtare të Bashkimit Evropian që aplikojnë standardet e Farmakopesë Evropiane dhe 100 shtete të tjera që i përdorin.

(BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb