TIRANË- Ratifikimi i marrëveshjes për themelimin e Fondit të Ballkanit Perëndimor(FBP) shqyrtohet të hënën në komisionet e përhershme të Kuvendit, ndërsa ratifikimi i saj pritet të miratohet të enjten në seancë plenare.
Marrëveshja synon financimin e projekteve të vogla dhe të mesme në fusha si arsimi, kultura, mjedisi, bashkëpunimi ndërkufitar, etj, përmes krijimit të këtij Fondi, një strukturë e përbashkët që synon nxitjen e procesit të integrimit europian, mbështetur në modelin e Grupit të Vishegradit. Palë nënshkruese të kësaj marrëveshje janë Shqipëria, Bosnje e Hercegovina, Mali i Zi, Maqedonia, Kosova dhe Serbia. Vendet pjesëmarrëse në FBP kanë rënë dakord që selia e Fondit të jetë në Tiranë dhe drejtori i parë ekzekutiv, i cili qarkullon me rotacion 3-vjeçar, të jetë shqiptar.
Përpjekjet e mëdha të diplomacisë shqiptare u kurorëzuan me sukses duke arritur të sjellin për herë të parë në Shqipëri selinë e një nisme rajonale. Në një plan më të gjerë marrëveshja synon afrimin mes vendeve të Ballkanit Perëndimor dhe forcimin e bashkëpunimit rajonal, duke stabilizuar më tej hapësirën e Evropës Juglindore. Ajo do të nxisë dialogun politik ndërmjet palëve, si dhe bashkëpunimin në fusha të ndryshme, nëpërmjet takimeve në nivel politik dhe teknik në fusha me interes të përbashkët.
Gjithashtu, nisma do të kontribuojë në integrimin evropian të Republikës së Shqipërisë dhe do të afirmojë vlerat evropiane të saj në bashkëpunimin rajonal. Qëllimi i Fondit është përmirësimi i marrëdhënieve dhe thellimi i bashkëpunimit me vendet fqinje në fusha të ndryshme, duke ndihmuar në ruajtjen dhe konsolidimin e paqes e të stabilitetit demokratik, me pikësynim final ankorimin e vendeve të Ballkanit Perëndimor në NATO dhe BE.
Marrëveshja do të miratohet nga vendet pjesëmarrëse në përputhje me legjislacionin e tyre të brendshëm dhe do të hyjë në fuqi ditën kur instrumenti i fundit i ratifikimit do të depozitohet në Republikën e Shqipërisë. Një vend pjesëmarrës mund të tërhiqet nga marrëveshja në çdo kohë, por duke njoftuar vendet e tjera pjesëmarrëse gjashtë muaj përpara.
(ed.me/BalkanWeb)
