Befasisht dje në darkë mediat britanike dhanë lajmin se Liverpool ka arritur marrëveshjen me Monaco-n për transferimin e brazilianit Fabinho, në një kohë kur nuk ishte raportuar asnjë interesim i anglezëve për lojtarin.
Nuk vonoi shumë dhe vetë klubi zyrtarizoi në rrjetet sociale blerjen më të re, me 24-vjeçarin i cili shfaqej teksa nënshkruante kontratën.
Disa orë më vonë mediat britanike kanë zbuluar se kontrata e firmosur nga Fabinho, e cila shfaqet në video, nuk është ajo e vërteta pavarësisht se në titull shkruante: “Kontratë marrëveshje me futbollistin”.
Në hyrje të tekstit gjendet një deklaratë e trajnerit Kloop e dhënë para ndeshjes finale në “Champions”. “Ne jemi këtu sepse jemi Liverpool”- lexohet në hyrje të ‘kontratës’. Një deklaratë kjo e gjermanit e dhënë për “Daily Mail”.
Pavarësisht këtij fakti Fabinho është tashmë një lojtar i Liverpool. Anglezët për shërbimet e lojtarit kanë paguar 43.7 mln stërlina, ndërsa vetë lojtari ka rënë dakord për të qëndruar për 5 vite në “Anfield”.
(e.k/BalkanWeb)