Më shumë se 100 persona kanë mbetur të vdekur dhe 50 të tjerë të lënduar në Nigerinë veriperëndimore teksa po përpiqeshin të merrnin karburant nga një cisternë e përmbysur, e cila përmbante benzinë, duke bërë që automjeti të eksplodonte, kanë bërë të ditur shërbimet e urgjencës të mërkurën.

Aksidenti ndodhi në mesnatë në qytetin Majiya të shtetit Jigawa, pasi shoferi i cisternës humbi kontrollin e automjetit ndërsa po udhëtonte në një autostradë, ka thënë zëdhënësi i policisë lokale Lawan Adam, raporton AP.

Nëntëdhjetë e shtatë persona janë djegur deri në hi në vendngjarje, ndërsa tetë të tjerë vdiqën në spital, ka bërë të ditur për Associated Press Dr. Haruna Mairiga, kreu i Agjencisë Shtetërore të Menaxhimit të Emergjencave në Jigawa.

Aksidentet vdekjeprurëse të cisternave janë të zakonshme në Nigeri, vendi më i populluar i Afrikës, ku rregulloret e trafikut nuk zbatohen rreptësishtë në shumë vende, dhe ka mungesë të alternativave për transportin e mallrave.