Mbreti Charles III i Britanisë i cili ishte pjesë e Takimit të Kryetarëve të Qeverive të Komonuelthit (CHOGM) në Samoa deklaroi se efektet “e dhimbshme” të tregtisë së skllevërve dhe kolonializmit vazhdojnë, transmeton Anadolu.
Duke folur në CHOGM të mbajtur në Apia, kryeqyteti i Samoa-s, me pjesëmarrjen e liderëve të 56 vendeve, Mbreti Charles bëri vlerësime për problemet e hasura në fushën e kolonializmit, krizës klimatike dhe zhvillimit.
Duke theksuar se kur dëgjoi njerëzit në të gjithë Komonuelthin, u tha se efektet “e dhimbshme” të periudhës koloniale vazhduan, Mbreti Charles u shpreh se të kuptuarit e historisë së përbashkët që ndan komuniteti është e rëndësishme kur bëhen zgjedhjet e duhura në të ardhmen.
“Askush prej nesh nuk mund ta ndryshojë të kaluarën, por ne mund të mësojmë prej saj dhe të gjejmë metoda efikase për të korrigjuar pabarazitë e vazhdueshme” tha Charles.
Nga ana tjetër, ndërsa disa udhëheqës të Komonuelthit menduan se Mbreti Charles III mund ta përdorte platformën si një mundësi për të kërkuar falje për të kaluarën koloniale të Britanisë dhe rolin në tregtinë e skllevërve transatlantik, Mbreti në fjalimin e tij nuk e trajtoi drejtpërdrejt këtë çështje.
Britania nuk kërkoi falje zyrtarisht asnjëherë për rolin e saj në tregtinë e skllevërve.
