ITALI

Policia italiane në Taranto të Italisë ka arrestuar dy shqiptarë 24 dhe 21 vjeç, pasi u kapën me heroinë në makinë.

Banorët vendas kishin raportuar pranë karabinierëve se dy persona lëviznin me makina dhe dyshohet se ata kishin armë e merreshin me aktivitet të paligjshëm. Pas sinjalizimit, forcat policore të Barit u mobilizuan dhe u vunë në ndjekje të dy makinave, që drejtoheshin prej të rinjve me origjinë nga Shqipëria, shkruajnë mediat italiane.

Të dy të arrestuarit, njëri prej të cilëve me precedentë penalë specifikë për trafik droge, që të dy banonin në provincën e Barit, u shoqëruan në zyrat e komisariatit, ku dhanë shpjegime për çështjen. Karabinierët kanë mundur të sekuestrojnë gjithashtu edhe 895 euro, që ishin në automjet dhe që dyshohet se janë përfituar nga aktiviteti i trafikut të drogës.

Njëri nga të arrestuarit ishte me precedent të mëparshëm penal për trafik të lëndëve narkotike. Policia në Taranto deklaroi se arrestimi i dy personave është në vazhdë të luftës ndaj trafikut të drogës.

(d.xh/Balkanweb)