Një ngjarje e rëndë goditi opinionin publik në 23 korrik të këtij viti. Një 18-vjeçar nga Elbasani, i cili vuan nga prapambetja mendore, u abuzua seksualisht. Ishin prindërit të revoltuar që bënë denoncimin në Policinë e Elbasanit. Sot në emisionin “Me Zemër të Hapur ”, në News24, familjarët e 18-vjeçarit rrëfyen ngjarjen e tmerrshme.



Babi i djalit tregon se 42-vjeçari që ka abuzuar me të birin, i ka kërkuar këtij të fundit ta ndihmonte të ngjiste lart në shtëpinë e tij një arkë me banane. Sipas të atit të djalit, pasi i biri është ngjitur lart, 42-vjeçari e ka përdhunuar atë. Babi thotë se djali është me aftësi të kufizuara. Burri rrëfen se ai fillimisht i ka treguar të ëmës për këtë ngjarje të hidhur.


Menjëherë gruaja i ka rrëfyer bashkëshortit dhe të dy së bashku i janë drejtuar Policisë së Elbasanit. Babai i 18-vjeçarit thotë se policia ka bërë ballafaqimin dhe e ka gjobitur personin me 20 mijë lekë të vjetra. Prindërit vijnë sot në studio të bëjnë apel për ndihmë. Ata duan ndëshkimin e 42-vjeçarit, i cili ka kryer me forcë marrëdhënie seksuale me të birin.

“Djali vuan nga prapambetja mendore, shkoi tek ai zotëri ta ndihmonte, ai e mori brenda, kyçi deren dhe e përdhunoi. Në datën 20 korrik ka ndodhur ngjarja. Pas 1 muaji, në datën 17, policia bëri ballafaqimin, por për shkak se është me të meta mendore nuk e morën parasysh. Ai zotëri është 41 vjeç, ndërsa djali im është 18 vjeç. Unë vetë jam marrë me shoqatën me njerëzit me aftësi të kufizuara, jam njohur me këtë person kur shiste banane afër një institucioni ku shkoja dhe punoja. Ky zotëri është i martuar dhe ka 2 fëmijë.

Këtë çështje, nëse shteti nuk e burgos atë njeri, unë edhe pse fukara do ta çoj deri në Strasburg. Gruaja e tij bërtiste, ajo ka deklaruar se nëse burri i saj e ka bërë këtë gjë, atëherë burri të dënohet dhe të marrë ndëshkimin e duhur.

Djali thotë “ai më mori brenda, mbylli derën e jashtme, mbylli derën e brendshme, pastaj me shtriu ne divan dhe më hoqi pantallonat”. Tani ai thotë se ka shqetësime, i dhemb barku. Kërkova psikologun, doja ndihmën e tij, sepse djali po më ikën dhe nuk më futet në shtëpi, ai ka kaluar nuk rri dot me brenda në shtëpi. Te psikiatri i kam marrë mjekimet, por ai vazhdon të ketë dhimbje barku”, tha babai i djalit të përdhunuar.

Emisioni “Me  Zemër të Hapur” i është drejtuar Policisë së Elbasanit për rastin e rëndë. Në një lidhje telefonike me shefin e Komisariatit, Arjan Muça, emisioni mësoi se policia, pasi ka kryer inspektimet, ka kaluar çdo material në Prokurori. Babi i djalit në anën tjetër thotë se asnjë hetim nuk është nisur.

“Atë ditë ka shkuar gruaja në komisariat. Çdo të mërkurë drejtori i policisë ka takim me popullin, mua s’më kanë lejuar të takohem me të. Pse nuk u bë ekspertiza në Elbasan? Personi i akuzuar është i lirë tani, shet banane bashkë me gruan poshtë komisariatit. Kam ardhur nga fshati në Elbasan vetëm që fëmijët e sëmurë të shkollohen e të bëhen të zotë për vete. Ai luan dhe rri me të tjerët, kur inatoset bërtet e shan, kur e ngacmojnë të tjerët. Djalin tim e dua siç ka qenë, unë do kërkoj drejtësi, nëse shteti nuk vë dorë.

(BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb