SHBA
Pak ditë na ndajnë nga transmetimi i projektit më të fundit të Meghan Markle. Bëhet fjalë për një serial të ri që do të shfaqet në Netflix, i titulluar ‘With Love, Meghan’, traileri i të cilit është publikuar në llogarinë e re në Instagram të dukeshës së Sussex-it, si dhe në platformën e transmetimit.
Me këtë projekt, Meghan rikthehet te tema e saj e preferuar, lifestyle: episodet përqendrohen te gatimi, kopshtaria dhe mikpritja. Në çdo episod, Meghan mirëpret në shtëpinë e saj disa të ftuar, me të cilët ndan momente në kuzhinë dhe shumë më tepër. “Shpresoj ta doni shfaqjen po aq sa kam dashur unë ta realizoj,” ka shkruar Meghan në Instagram, ndërsa në minutat e shkurtër të trailerit ajo shpjegon pasionin e saj për mikpritjen. “Gjithmonë më ka pëlqyer të marr diçka të zakonshme dhe ta ngre atë në një nivel tjetër, duke surprizuar njerëzit me momente që u tregojnë se vërtet kam menduar për ta. Kjo ka të bëjë me krijimin e lidhjeve me miqtë, bërjen e miqve të rinj dhe thjesht të mësuarit,” shton ajo.
Në klip, Meghan shfaqet si një eksperte në kuzhinë, mes tortave, bukëve dhe kupave me akullore. “Dashuria është te detajet,” thekson ajo, gjithmonë me një buzëqeshje dhe si protagoniste absolute e skenës. With Love, Meghan përbëhet nga tetë episode dhe, sipas burimeve të para, disa nga të ftuarit e dukeshës përfshijnë miq të ngushtë të saj, si aktorja Mindy Kaling, fotografja argjentinase Delfina Blaquier, stilistja Tracey Robbins dhe ish-kolegja e saj nga seriali Suits, Abigail Spencer. Në serial marrin pjesë gjithashtu kuzhinierë të njohur, si Roy Choi, Ramon Velazquez dhe Alice Waters.
Sipas Netflix-it, “ky serial është frymëzues, i prodhuar nga Meghan, dukesha e Sussex-it, dhe rishpik zhanrin e programacionit lifestyle, duke kombinuar këshilla praktike dhe biseda të sinqerta me miq, të rinj dhe të vjetër.” Më tej, ata shtojnë: “Meghan ndan këshilla dhe truke personale, duke preferuar aspektin argëtues ndaj përsosmërisë dhe duke theksuar sa e thjeshtë është të krijosh bukuri, edhe në të papriturën. Ajo dhe të ftuarit e saj përveshin mëngët në kuzhinë, në kopsht dhe përtej, duke ju ftuar të bëni të njëjtën gjë.”
Mbetet për t’u parë nëse edhe Princi Harry do të shfaqet në ndonjë episod në rolin e pazakontë të kuzhinierit: në trailer ai duket vetëm për disa sekonda. Tani, mbetet vetëm të presim debutimin e serialit…
