TIRANË- Princi i Monakos, Alberti II ka mbërritur sot në Shqipëri, me ftesë të Presidentit të Republikës, Ilir Meta.

Fillimisht Princ Alberti II u prit në ceremoni zyrtare nga Kreu i Shtetit në ambientet e Presidencës, për të vijuar më pas me bisedimet dypalëshe midis delegacioneve respektive.

Gjatë ceremonisë në “Pallatin e Brigadave”, presidenti Meta në shenjë vlerësimi i ka dorëzuar  Princit të Monakos “Dekoratën e Flamurit Kombëtar”.

Presidenti Meta theksoi faktin se kjo është dekorata më e lartë, që shqiptarët iu dorëzojnë miqve të tyre.

“Dita e sotme, historike për marrëdhëniet dypalëshe midis Shqipërisë dhe Principatës së Monakos. Në emër të shqiptarëve i akordoj Dekoratën e “Flamurit Kombëtar” Princit të Monakos . Kjo është dekorata më e lartë, me të cilën ne shqiptarët nderojmë e respektojmë miqtë tanë më të mirë. Mirënjohje të veçantë për njohjen e Shtetit të Kosovë”, tha Presidenti Meta.

Presidenti Meta vlerësoi rëndësinë e bashkëpunimit konkret, në fushat ku eksperienca dhe ekspertiza e Monakos është shumë e njohur ndërkombëtarisht, si në turizëm e në mbrojtjen e mjedisit, zhvillimin e ekonomisë së gjelbër, inovacion e teknologjinë, në shërbimet financiare, trajnimin profesional e në fusha të tjera me interes.

Kreu i Shtetit kërkoi gjithashtu nxitjen e biznesit të Monakos që të eksplorojë dhe investojë në tregun shqiptar.

Presidenti i Shqipërisë ka vlerësuar kontributin e Monakos për disa zona të mbrojtura në Vlorë, ndërsa shtoi se Shqipëria përmes ndihmës shumë shpejt mund të bëhet anëtare e Komisionit Shkencor Mesdhetar.

“I bëj thirrje biznesit monegask për ta eksploruar e për ta parë Shqipërinë si mundësi investimi. Nënshkrimi i Memorandumit të Mirëkuptimit midis Ministrive të Jashtme të të dy vendeve, një hap i parë shumë pozitiv. Vlerësoj rolin dhe kontributin e Princit Albert II në kuadër të promovimit dhe mbrojtjes së ambientitShqipëria dhe Principata e Monakos, ndajnë vlera, interesa dhe sfida të përbashkëta. Vlerësoj shumë mbështetjen e dhënë nga Fondacioni i Princit për projekte të veçanta në zonat e mbrojtura detare të Vlorës. Shqipëria i ka të gjitha mundësitë për të qenë një “green economy”, në të ardhmen . Përmes bashkëpunimit me Monakon, Shqipëria mund të bëhet së afërmi anëtare e Komisionit Shkencor Mesdhetar”, shtoi i pari i shtetit.

(n.m/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb