TIRANE- Ministri për Europën dhe Punët e Jashtme, Ditmir Bushati shprehet i bindur se hapja e negociatave për anëtarësimin në Bashkimin Europian do të ndodhë qershorin e vitit të ardhshëm.

“Jam absolutisht i sigurtë që nëse vazhdojmë me këtë ritëm përsa i përket zbatimit të reformës në drjetësi, sa i përket zbatimit të vettingut dhe nëse krijojmë një klimë politike si ajo që krijuam para zgjedhjeve, Shqipëria do të ketë një vendimarrje për fillimin e negociatave vitin tjetër”, tha ai në “Top Story”.

Lidhur me kushtet e palës greke, Bushati la të kuptohej se ato nuk janë pjesë e prioriteteve të Komisionit Europian dhe si të tilla nuk mund të quhen kushte.

“Janë pesë prioritete nga 12 që ishin në momentin që Shqipëria aplikoi. Raporti i KE erdhi me propozimin për hapjen e negociatave duke veçuar reformën në drejtësi dhe vettingun, duke patur parasysh edhe çështje të tjera, edhe për çështjen e pronës që zoti Kotzias foli”, deklaroi Bushati.

Kryediplomati shqiptar tha se nuk beson se Greqia do të bllokojë hapjen e negociatave, ndërkohë katër kushtet e përmendura nga Kotzias i quajti çështje mes dy vendeve.

“Kemi një raport intensiv komunikimi në planin formal dhe joformal dhe besoj se qëndrimet mes Shqipërisë dhe Greqisë për çështje dypalëshe janë të qarta. Ka një mekanizëm koordinues në dy Ministritë e Jashtme dhe janë këmbyer pikëpamje për çështje të natyrave të ndryshme”, u shpreh Ditmi Bushati.

NEGOCIATAT, BUSHATI: BASHA FOLI ME GJUHËN E BERISHËS
“Kthimi në gjuhën e vjetër dhe në traditën e Sali Berishës. Sot në Kuvend m’u duk Basha fizikisht që fliste me gjuhën e Berishës”.

Me këto fjalë ministri i Jashtëm Ditmir Bushati komentoi deklaratën e Lulzim Bashës nga salla e Parlamentit. Kreu i Partisë Demokratike tha se negociatat për anëtarësimin nuk do të hapen dhe kjo jo për shkak të opozitës, por për faj të qeverisë.

Por Bushati tha se BE ka një plan të qartë për zgjerimin e saj.

“Plani është i qartë dhe vetë fjalimi i fundit i Juncker reflekton një qasje të ndryshme nga vetë komisioni, përsa i përket politikës së zgjerimit. Komisioni Europian ka një raport dhe nisjen e bisedimeve nëse zbatojmë reformën në drejtësi dhe ligjin e vettingut”, tha ai.

Por jo gjithçka varet nga qeveria.

“Fakti që Basha shpalli një rivalitet për këtë proces është i vajtueshëm, sepse ky është një proces që qeveria ka pjesën e vet, por nevojitet bashkëpunimi i gjithë aktorëve politikë për të zbatuar reformën në drejtësi dhe për të mbështetur institucionet e sigurisë dhe ligjzbatuese për të përshkallëzuar luftën kundër krimit të organizuar dhe korrupsionit. Nuk ka kushte shtesë. Flitet për pesë prioritete dhe për një rekomandim të qartë të KE në këtë drejtim”, u shpreh Bushati./tch/

(BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: