Për herë të parë në Spitalin Hygeia një ekip mjekësh kardiologë shqiptarë, arrijnë të realizojnë me sukses një ndërhyrje tepër delikate në aortë, ndërhyrje kjo e realizuar nën drejtimin e dr.Maksim Llambro, shef i Departamentit të Kardiologjisë në Spitalin Hygeia.
Pacienti i moshës 50 vjeç u paraqit në Spitalin Hygeia dhe ankonte për dhimbje të forta në gjoks, ku pas ekzaminimeve të detajuara u diagnostikua me diseksion (shkolitje) e mureve të aortës zbritëse (diseksion i tipit B), rast për të cilin ekipi i mjekëve vendosi trajtimin me vendosje të endoprotezës në rrugë perkutane.
Aorta është arteria kryesore dhe më e rëndësishme në trupin e njeriut dhe është përgjegjëse për transporitmin e gjakut nga zemra në të gjitha organet dhe sistemet e organizmit. Ndër sëmundjet më të rrezikshme që prekin aortën është edhe Diseksikoni i Aortës që konsiderohet edhe një nga gjendjet mjekësore më urgjente. Diseksion të aortës kemi në rastet kur cipa e brendshme e aortës shqitet duke krijuar hapësirë në brendësi të murit dhe gjaku hyn nga kjo çarje e krijuar duke krijuar një rrugë false midis paretit të brendshëm dhe të jashtëm të aortës. Si rrjedhojë e diseksionit ndodh ngushtimi i lumenit të aortës duke pakësuar kështu sasinë e gjakut që duhet të shpërndahet në organizëm.
Diseksioni përbën rrezik për jetën e pacientit në rastet kur përfshin arteriet e organeve abdominale ose anësitë e poshtme. Shkaqet që çojnë në Diseksion të aortës mund të jenë hipertensioni arterial, kolesteroli i lartë, histori familjare me diseksion të aortës, sëmundje të lindura të zemrës, etj.
Pacienti, pas vlerësimit paraprak që ju bë nga eikipi i mjekëve kardiologë, u vendos t’i nënshtrohej Ndërhyrjes për riparimin e diseksionit me vendosje të një Endoproteze e në segmentin proksimal të zonës së disekuar (të çarë) të aortës, ndërhyrje kjo e realizuar totalisht në rrugë perkutane (pa inçizion) dhe nën anestezi lokale. Ndërhyrja rezultoi e suksesshme, pa komplikacione mjekësore dhe pa kompromentim të fluksit të vazave të medha me origjinë në zonën e implantimit të endoprotezës.
Ky sukses, i cili nuk është i vetmi në këtë fushë, u bë i mundur sajë profesionalizmit të ekipit të mjekëve kardiologë nën drejtimin e mjekut të mirënjohur, dr.Maksim Llambros, si dhe teknologjisë bashkëkohore që Spitali Hygeia disponon. Pacienti ka lënë Spitalin në kushte mjaft të mira shëndetësore duke ju rikthyer aktiviteteve të tij.