ITALI

Moti i keq ka përfshirë pjesën më të madhe të Italisë. Reshjet e dendura të shiut kanë shkaktuar përmbytje, teksa në Toskana, zona më e prekur nga moti i keq, raportohet për tre viktima dhe gjashtë të humbur.

Aktualisht rajoni ka shpallur gjendjen e jashtëzakonshme, teksa po mban kontakte me qeverinë qendrore në rast se situata përkeqësohet dhe është e nevojshme ndihmë tjetër.

Lumenjtë po arrijnë në kuota maksimale dhe shumë shpejt dalja e tyre do ta përkeqësojë më tej situatën pasi reshjet pritet të vijojnë me intensitet të lartë dhe në orët në vijim.

Autoritetet kanë pezulluar procesin mësimor në shumë shkolla, teksa problematika të mëdha janë hasur dhe në qarkullimin e mjeteve dhe atë hekurudhor. Kryebashkiaku Matteo Biffoni u ka bërë thirrje qytetarëve që të mos dalin nga shtëpitë e tyre.

“Situata është problematike, lumi Arno pritet të arrijë kulmin rreth mesditës në Firence, por nuk ka shqetësime të veçanta për këtë nëse ndalon shiu,” tha guvernatori Eugenio Giani në një intervistë për Radio Anch’io të RAI.

Pacientët nga tre spitale të veçanta duhej të transferoheshin në objekte të tjera dhe shumë ndërtesa u dëmtuan rëndë, shtoi ai. Ministria e Mbrojtjes po mbështeste përpjekjet e shpëtimit duke dërguar helikopterë, kamionë dhe pompa uji në zonat e goditura nga përmbytjet, tha në një deklaratë ministri i Mbrojtjes Guido Crosetto.

Agjencia italiane e Mbrojtjes Civile lëshoi të enjten një paralajmërim për shira të dendur dhe erëra të forta në Italinë qendrore dhe jugore, me një “kod të kuq” të lartë alarmi për Veneto dhe Friuli Venezia Giulia në veri të vendit dhe një alarm mesatar “kod portokalli”. për nëntë rajone të tjera. Një tjetër person u zhduk në rajonin Veneto, citohet të ketë thënë guvernatori lokal nga Sky TG24.

Kryeministrja Giorgia Meloni “po ndjek me shqetësim zhvillimin e ngjarjeve katastrofike që kanë goditur veçanërisht Toskanën dhe shpreh ngushëllimet e saj të thella për viktimat.