TIRANË
Pas dorëzimit të mandatit të deputetit nga Nard Ndoka, Kuvendi ka njoftuar menjëherë krijimin e vendit vakant, ndërsa i bën thirrje KQZ-së të zëvendësojë mandatin e tij.
Kreu i PDK-së hoqi dorë nga mandati disa ditë pas kolegëve të tjerë brenda selisë blu, pasi ky i fundit ndodhej me punë jashtë vendit. Ndoka arriti të mandatohej në qytetin e Shkodrës në zgjedhjet e mbajtura me 25 qershor të 2017, ndërsa garoi në radhët e PD-së.
Pas njoftimit nga Kuvendi, KQZ tashmë ka për detyrë t’i drejtohet kandidatit në listë pas Ndokës për të plotësuar vendin vakant, ndërsa kandidati duhet të dorëzojë pranë institucionit të lartpërmendur formularin e dekriminalizimit.
Në listën e deputetëve nga të dyja partitë opozitare disa emra nuk pranuan të dorëzojnë mandatin e deputetit. Në radhët e PD-së, i pari që doli kundër kësaj nisme ishte Myslim Murrizi, ndërsa tek LSI-ja u shpreh kundër djegies ish-ministri i Mjedisit, Lefter Koka.
Gjithashtu ka ndezur polemika edhe qëndrimi i vajzës së Azem Hajdarit, Rudina Hajdari, e cila nuk ka vendosur ende për djegien e mandatit.
