Deputetja Mesila Doda ka replikuar ndaj qëndrimeve që Nard Ndoka ka mbajtur ndaj saj paraditen e së martës në ambientet e Kuvendit. Në një reagim në rrjetin social “Facebook”, Mesila Doda ka publikuar një video të xhiruar nga vetë deputeti Ndoka gjatë një udhëtimi në vendet e Amerikës Latine, me mbishkrimin: “Ky është bur shteti”.
Më herët, është raportuar se Nard Ndoka vijon të çudisë me performancën e tij brenda dhe jashtë Parlamentit.
Pas videos së bërë pak ditë më parë në një nga vendet e Amerikës Latine ku kishte mësuar edhe të përshëndeste në spanjisht, ai ka tërhequr vëmendjen e gazetarëve edhe sot në Kuvend.
Deputetja e PDsë, Mesila Doda ka debatuar gjatë me kryetarin e komisionit të Ligjeve Fatmir Xhafaj për disa ndryshime në Kodin Zgjedhor ku parashikohej edhe rritja e pranisë së grave në listat e kandidatëve.
Në përfundim të mbledhjes ajo ka bërë edhe një deklaratë për mediat. Në atë moment pranë Dodës në një nga korridoret e katit të dytë të Kryesisë së Kuvendit ka kaluar edhe Nard Ndoka, i cili teksa i është afruar deputetes iu drejtua gazetarëve duke thënë “Kjo klasifikohet te burrat”.
Sipas të gjitha gjasave Doda nuk e ka dëgjuar fjalën e Ndokës, në të kundërt reagimi i saj do të ishte edhe më i ashpër sesa përplasja me Fatmir Xhafën.
(m.k/BalkanWeb)