TIRANË

Ministri i Financave dhe Ekonomisë, Arben Ahmetaj deklaroi se buxheti i vitit 2019 do sjellë ndryshime pozitive dhe në interes të qytetarëve.

Ai tha se për herë të parë ndihma ekonomike për familjet në nevojë do të jetë në 80 mijë lekë të vjetra. Ahmetaj u ndal edhe tek  taksa progresive, që sipas tij ka dhënë impakt të drejtpërdrejt në ekonomi dhe tek ekonomia e shqiptarëve.

Mes tjerash, ministri tregoi shifra duke akuzuar paraardhësit se në vitin 2012 krijuan një gropë të madhe në ekonominë shqiptare.

“Po i referohemi gjithmonë raportit të Bankës Botërore. Buxheti ashtu si buxhetet e fundit është fokusuar tek politikat sociale. Diçka më shumë se 50 për qind shkon tek paketa sociale, ndërsa nuk duhet të harrojmë një gjë e cila është futja në rimbursimin e shqiptarëve, rreth 6oo mijë shqiptarë me rimbursim.

Do vijojmë të rrisim mbështetjen e përfitimit, për familjet që përfitojnë ndihmë ekonomike. Rritja e mbështetjes shkon maksimale në 80 mijë lekë të vjetra. Patjetër që është e pamjaftueshme, skema e ndihmës është kalimtare. Mos harroni se dikur në 2012 në vitin e gropës më të thellë të varfërisë kjo shkonte në 60 mijë lekë të vjetra”, tha Ahmetaj.

(n.m/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb