TIRANË
Deputetja demokrate, Rudina Hajdari ka reaguar sërish për lëvizjet e bëra tek grupi demokrat në Kuvend. Korab Lita u zyrtarizua një ditë më parë si kryetar i Grupit Demokrat, ndërsa sot ai shpjegoi të vërtetën para mediave.
Sipas Hajdarit, Korab Lita dhe gangsterët e tij kanë ushtruar presion ndaj deputetëve për fimat, përfshirë edhe deputeten Fatjona Dhimitrin. Deputetja Hajdari paralajmëron se pamjet filmike të disponuara nga zyrat e Kuvendit do t’i çohen Prokurorisë.
“Përveç një protagonizmi të shëmtuar mediatik, Korab Lita dhe gangsterët e tij, kanë ushtruar presion ndaj deputetëve, përfshirë edhe zj. Fatjona Dhimitri, e cila ka firmosur, për tërheqjen e këtij puçi. Pamjet filmike të disponuara nga zyrat e Kuvendit do t’i çohen Prokurorisë”-shkruan Hajdari, ndërsa publikon edhe letrën e deputetes dërguar kryetarit të Kuvendit, Gramoz Ruçit.
