DIBER- Policia e Dibrës ka arrestuar 3 persona në lidhje me vrasjen që ndodhi mbrëmjen e djeshme, ku mbeti i vrarë me thikë një 36-vjeçar. Burime zyrtare nga policia thanë se në pranga ra njërin nga autorët e dyshuar të vrasjes së shtetasit Ismail Zogu, Vangjel Balla, 20 vjeç, ndërsa vëllai i tij, autori kryesor Aleksandër Balla është në kërkim.
Ndërkohë, pas hekurave u vunë dhe pronari i një lokali, Sami Lusha, dhe djali i tij Blerim Lusha, 25 vjeç, banues në fshatin Arras. Këta të fundit u arrestuan për mos kallzim krimi, pasi ngjarja ndodhi në lokalin e tyre.
Ngjarja e rëndë ndodhi në orët e mbrëmjes së djeshme, ku dyshohet se shtetasi Aleksandër Balla (i shpallur në kërkim), gjatë një konflikti për motive të dobëta në lokalin e Sami Lushës në fshatin Arras në bashkëpunim me vëllain e tij Vangjel Balla, kanë vrarë me thikë shtetasin I.Z, 36 vjeç, banues në fshatin Sinë, njësia Administrative Arras. Gazetari Enver Doçi raporton për ‘BalkanWeb’ se viktima dhe autorët janë kushërinj njëri me tjetrin, ndërsa ata para pak ditësh ishin konfliktuar.
Nga veprimet e kryera dyshohet se shtetasi Sami Lusha dhe djali i tij Blerim Lusha, në bashkëpunim me njëri tjetrin nuk kanë kallzuar për rrethanat e krimit.
Materialet hetimore do t’i kalojnë Prokurorisë Pranë Gjykatës së Shkallës Parë Dibër për Vangjel e Aleksandër Ballën për veprën penale “Vrasje me paramendim”, kryer në bashkëpunim, parashikuar nga nenet 78 dhe 25 Kodit Penal, dhe për shtetasit Sami dhe Blerim Lusha për veprën penale “Moskallzim krimi”, kryer në bashkëpunim.
Mjeti i përdorur nga autori dhe arma e krimit
(ed.me/BalkanWeb)
