Këshilli i Evropës do japë sot veridiktin final për hapjen ose jo të negociatave për Shqipërinë dhe  për Maqedoninë e Veriut. Për këtë çështje ka folur edhe kryeministri i Holandës, e cila ka shfaqur skepticizëm për këtë proces, sidomos ndaj vendit tonë.


Rutte ka ngritur një shqetësim tjetër që prek vendin tonë: ndarjen e pushteteve. Diskutimet mbi zgjerimin e BE-së janë “shtyrë” për në takimin e radhës të Këshillit Evropian, u tha gazetarëve kryeministri holandez. Ai tha se udhëheqësit e BE-së kishin diskutuar gjatë për reformat në procesin e anëtarësimit, konkretisht për sundimin e ligjit dhe ndarjen e pushteteve, “çështje që shqetësojnë më shumë Shqipërinë” për të nisur rrugën e fillimit të bisedimeve.


Kryeministri holandez, Mark Rutte theksoi se të gjithë i kanë parasysh përpjekjet dhe arritjet që ka bërë deri tani Shqipëria, por shtoi se kjo nuk mjafton për një përgjigje pozitive ndaj negociatave. Kështu pas Francës, edhe Holanda duket se rikonfirmoi qartë qëndrimin e saj të ftohtë ndaj Shqipërisë, duke i mbyllur derën kështu mundësive për nisjen e bisedimeve me BE.


“Të gjithë i kemi të qarta përpjekjet e Shqipërisë dhe të Maqedonisë së Veriut. Shqipëria ka bërë shumë punë, por ka ende për të bërë. Shqipëria ka një rrugë pak më të gjatë për të bërë. Gjithsesi ajo ka bërë shumë progres”-tha mes tjerash, kryeministri i Holandës për “Politico.eu”, duke shtuar se duhen reforma të thella në përmirësimin dhe zbatueshmërinë e ligjit.

(n.m/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: