NATO po shqyrton rritjen e objektivit për shpenzimet e mbrojtjes në 3 për qind të PBB-së.
Ky objektiv mund të vendoset në Samitin e Liderëve të NATO-s në Hagë në qershor 2025, duke rritur kështu nivelin nga 2% shpenzime për mbrojtjen në 3%.
NATO aktualisht po kalon procesin e saj të planifikimit të mbrojtjes që do të përfundojë në vitin 2025. Megjithatë, burimet e Whitehall sugjeruan se një rritje në 3 përqind do të ishte “e vështirë” për t’u përmbushur.
Kjo masë vjen pasi Donald Trump, presidenti i zgjedhur që do të kthehet në Shtëpinë e Bardhë në janar, u zotua që anëtarët evropianë të Aleancës të mbajnë mbi supe më shumë barrën ushtarake.
Sir Keir Starmer ka thënë më parë se “ambicia” e tij është të rrisë shpenzimet e mbrojtjes në 2.5 për qind, megjithëse një afat kohor se si do të arrihet kjo shifër nuk është vendosur.
Sipas objektivit të ri të NATO-s, anëtarëve do t’u kërkohet gjithashtu të kontribuojnë me më shumë tanke, avionë dhe sisteme armësh që nga viti i ardhshëm.
Në fillim të këtij muaji, John Healey, Sekretari i Mbrojtjes, paralajmëroi se Mbretëria e Bashkuar duhet të transformojë Forcat e saj të Armatosura me një “ritëm të kohës së luftës” për t’u treguar kundërshtarëve se Britania mund të reagojë shpejt.
Healey i bëri komentet ndërsa lançoi strategjinë industriale të mbrojtjes, e cila synon të përmirësojë sektorin e mbrojtjes në Mbretërinë e Bashkuar.
Ka shqetësime midis liderëve evropianë se Trump do ta detyrojë Ukrainën në një marrëveshje të padrejtë paqeje kur të marrë zyrtarisht detyrën e Presidentit të SHBA.
Në rast të një marrëveshjeje paqeje, ushtarët evropianë – përfshirë trupat britanike – mund të patrullojnë territorin ukrainas si pjesë e garancive të sigurisë.
Emmanuel Macron, presidenti francez dhe Donald Tusk, kryeministri polak, do të diskutojnë planet për të dërguar trupa evropiane në Ukrainë si një forcë paqeruajtëse pas përfundimit të luftës me Rusinë.
Nga 32 anëtarët e NATO-s, vetëm 11 arrijnë objektivin aktual prej 2 përqind, i cili u vendos më shumë se një dekadë më parë.
