Një tjetër pengesë për Brazilin, pas barazimit 1-1 ndaj Venezuelës në Estadio Monumental de Maturín. Seleção e nisi mirë ndeshjen dhe ishte afër kalimit në avantazh në minutën e njëzetë me Vinicius, por goditja e sulmuesi madrilen u ndal nga shtylla. Më pas Raphinha ishte protagonist në minutën e 43-të, duke prodhuar një tjetër perlë në një sezon që deri tani e ka parë si një protagonist të madh si me kombëtaren ashtu edhe me Barcelonën, për zhbllokimin e shifrave në 0-1. Numri 10 i gjelbër dhe i artë shënon direkt nga gjuajtja e lirë, me topin që prek lehtë shtyllën para se të godasë rrjetën.
Venezuela më pas e gjeti veten prapa në pjesën e parë, por Batista bëri një shaka të vërtetë. Në fakt, trajneri i Vinotintos aktivizoi Segovian në fillim të pjesës së dytë dhe, pas vetëm një minute, ishte mesfushori ai që vulosi barazimin 1-1 me një gol të bukur, në fund të një manovre spektakolare të vendasve. Më pas ishte sërish Brazili që pati një shans të madh për t’u rikthyer në avantazh në minutën e 62-të me anë të një 11 metërshi, por Vinicius e humbi atë, duke treguar edhe njëherë tjetër momentin jo të mirë që po kalon, që pas ceremonisë së “Topit të Artë”.
Në finale të lojës, Venezuela mbeti me dhjetë lojtarë për shkak të përjashtimit të Gonzalez me karton të kuq (89′), por gjithsesi arriti të ruajë barazimin. Rezultati 1-1 ngadalëson ecurinë e Brazilit, i cili shkon në 17 pikë në renditje, por tani rrezikon të humbasë vendin e tretë ndaj Uruguait. Venezuela ndërkohë mbetet në kuotën e 12 pikëve.
