Presidenti i Venezuelës Nicolas Maduro njoftoi se qeveria e tij do të rifillojë dialogun e drejtpërdrejtë me autoritetet amerikane, duke synuar të përmirësojë marrëdhëniet dypalëshe dhe të promovojë marrëveshje të përbashkëta politike.

Në një fjalim televiziv, presidenti përcolli pranimin e propozimit të qeverisë amerikane për rifillimin e dialogut të drejtpërdrejtë.

Sipas presidentit, Jorge Rodriguez Gomez, president i Asamblesë Kombëtare të Venezuelës, do të përfaqësojë qeverinë venezueliane si kreu i Komisionit Kombëtar të Dialogut në dialogët e ardhshëm të drejtpërdrejtë me autoritetet amerikane.

Jorge Rodriguez Gomez do të shoqërohet nga Hector Rodriguez Castro, guvernatori i shtetit qendror të Mirandës, i cili ka marrë pjesë edhe më parë në proceset e dialogut.

Presidenti theksoi si kusht që çdo iniciativë e dialogut apo negociatave politike në të cilat merr pjesë Karakasi do të zhvillohet gjithmonë “nën sovranitetin dhe pavarësinë absolute të Venezuelës”.

Ai theksoi se këto bisedime paraqesin “mundësinë për të rivendosur kushtet e dialogut me respekt, pa manipulim dhe gjithashtu që të jenë dialogë publikë pa spekulime”.

“Unë jam një njeri i dialogut dhe dua, përmes dialogut, të respektoj Venezuelën, demokracinë e saj dhe popullin e saj; dua ta kapërcej këtë konflikt me veriun (Shtetet e Bashkuara), do të jetë në dorën e tyre të respektojnë”, tha presidenti.

Qeveria e Venezuelës ka shprehur në disa raste gatishmërinë e saj për t’u përfshirë në një dialog të respektueshëm me Uashingtonin. Gjithashtu, ka zbuluar se biseda të mëparshme private janë zhvilluar me përfaqësues të Shtëpisë së Bardhë.

(A.A/BalkanWeb)