Gjykimi ndaj ish-krerëve të UÇK-së, Hashim Thaçi, Kadri Veseli, Rexhep Selimi dhe Jakup Krasniqi, është shtyrë për shkak të mosparaqitjes së një dëshmitari të Prokurorisë.

Lajmi është konfirmuar nga Gjykata Speciale në një njoftim zyrtar. “Dëshmitari i Prokurorisë, i identifikuar si W04747, ishte planifikuar të jepte dëshminë e tij sot në mëngjes. Megjithatë, ai nuk mundi të paraqitej, dhe për këtë arsye, Prokuroria kërkoi që deklarata e tij me shkrim të pranohet si provë, në përputhje me Rregullën 155 të Rregullores”, thuhet në njoftim.

Pas kësaj, seanca kaloi në sesion privat për shqyrtimin e provave dhe më pas përfundoi për ditën. Seancat e planifikuara për pjesën e mbetur të javës janë anuluar, ndërsa gjykimi është shtyrë deri në një njoftim të dytë.