Policia e Beratit ka zhvilluar disa aksione në terren, me qëllim parandalimin e krimeve mjedisore.
Në pranga, ka rënë një 37-vjeçar, i cili është kapur në flagrancë në lagjen Barrikad të Beratit, me një mjet tip “Kamion” duke ngarkuar pllaka dekorative guri, të cilat dyshohet se janë nxjerrë në Malin e Tomorit. Gjithashtu sipas raportimeve, me vete, kishte dhe një punonjës të pasiguruar.
37-vjeçari i arrestuar nuk ishte një emër i panjohur për drejtësinë, pasi vetëm një muaj më parë ishte shpallur në kërkim nga policia, për veprën penale “Ndërtim pa leje”, “Fshehje e të ardhurave” dhe “Mospagim i taksave dhe tatimeve.
Materialet u referuan në Prokurorinë e Rrethit Gjyqësor Berat, për veprat penale “Punësim i paligjshem” dhe “Fshehja e të ardhurave”.
Njoftimi i plotë i Policisë:
Berat
Vijon zbatimi i planit të masave për parandalimin dhe goditjen e krimeve mjedisore.
Në kuadër të zbatimt të planit të masave për parandalimin dhe goditjen e krimeve mjedisore si dhe në vijim të kontrollit të ushtruar për mbrojtjen e territorit, shërbimet e Policisë kanë proceduar penalisht shtetasin M.S., 37 vjeç, (administrator subjekti), pasi u kap në flagrancë në lagjen Barrikad, me një mjet tip “Kamion”, të ngarkuar me pllaka guri dekorative, të cilët dyshohet të jenë nxjerrë në Malin e Tomorit, gjithashtu kishte dhe një punonjës të pasiguruar.
Nga veprimet hetimore të kryera rezultoi se ky shtetas ishte i shpallur edhe në kërkim në datën 12.05.2021 nga DVP Elbasan për veprat penale “Ndërtim pa leje”, “Fshehja e të ardhurave”, “Mospagim i taksave dhe tatimeve”. Veprimet e mëtejshme u kryen nga DVP Elbasan.
Materialet u referuan në Prokurorinë e Rrethit Gjyqësor Berat, për veprat penale “Punësim i paligjshem” dhe “Fshehja e të ardhurave”.
Policia e Shtetit do të vijojë kontrollet për parandalimin dhe goditjen e krimeve mjedisore dhe në këtë kuadër kërkon bashkëpunimin e qytetarëve që të denoncojnë çdo rast të paligjshmërisë në Komisariatin Dixhital apo në numrin pa pagesë 112, duke siguruar anonimatin dhe reagim të paanshëm kundrejt shkelësve të ligjit.
