OBSH paralajmëroi për mungesa të mëdha të barnave, ushqimit, strehimit dhe karburantit në Gaza , veçanërisht në veri, duke kërkuar që Izraeli të lejojë më shumë ndihmë dhe të lehtësojë operacionet humanitare .
Organizata Botërore e Shëndetësisë përshkroi një situatë “katastrofike” në terren.
Shefi i OBSH-së Tedros Adhanom Ghebreyesus tha se kur lufta në Gaza shpërtheu më shumë se një vit më parë pas sulmit vdekjeprurës të Hamasit më 7 tetor brenda Izraelit, pothuajse të gjithë ata të zhvendosur nga konflikti u strehuan në ndërtesa publike ose me anëtarët e familjes.
“Tani, 90 për qind jetojnë në tenda,” tha ai në një konferencë për shtyp në selinë e OBSH-së në Gjenevë.
“Kjo i lë ata të prekshëm ndaj sëmundjeve të frymëmarrjes dhe sëmundjeve të tjera, ndërsa moti i ftohtë, shiu dhe përmbytjet pritet të përkeqësojnë pasigurinë ushqimore dhe kequshqyerjen,” tha ai.
Situata ishte veçanërisht e rëndë në veriun e bllokuar, ku një vlerësim i mbështetur nga OKB-ja këtë muaj tha se uria po afrohet.
OBSH dhe partnerët e saj këtë javë kryen një mision tre-ditor në veri, duke vizituar më shumë se një duzinë objektesh shëndetësore.
Tedros tha se ekipi kishte parë “numër të lartë të pacientëve me traumë dhe një numër në rritje të pacientëve me sëmundje kronike që kishin nevojë për trajtim”.
“Ka mungesa kritike të barnave thelbësore.”
OBSH “po bën gjithçka që mundet — gjithçka që na lejon Izraeli të bëjmë — për të ofruar shërbime dhe furnizime shëndetësore”, shtoi ai.
Nga 22 misione të kërkuara në veri në nëntor, vetëm nëntë ishin lehtësuar, u tha gazetarëve Rik Peeperkorn, përfaqësuesi i OBT-së në territoret palestineze.
Ai tha se shpresonte se një mision i planifikuar të shtunën do të shkonte përpara në dy spitalet e vetme të mbetura edhe funksionale “minimale” në veri: Kamal Adwan dhe Al Awda.
“Ata kanë nevojë për gjithçka,” tha Peeperkorn.
Ai përshkroi veçanërisht mungesën e rëndë të karburantit, duke paralajmëruar se “pa karburant nuk ka fare operacione humanitare”.
Në një notë pozitive, Peeperkorn tha se OBSH kishte lehtësuar këtë javë evakuimin mjekësor të 17 pacientëve nga Gaza në Jordani, 12 prej të cilëve do të shkonin në Shtetet e Bashkuara për trajtim.
Ata ishin në mesin e afro 300 pacientëve që kishin mundur të largoheshin që kur Izraeli mbylli pikën kryesore kufitare Rafah të Gazës në fillim të majit, tha Peeperkorn.
Por rreth 12,000 pacientë aktualisht janë duke pritur në Gaza për t’u evakuuar për arsye mjekësore, tha ai, duke kërkuar korridoret mjekësore jashtë territorit.
“Nëse vazhdojmë me këtë ritëm, do të jemi të zënë për 10 vitet e ardhshme”, tha ai.
(A.A/BalkanWeb)
