Sulmet ajrore të Pakistanit në Afganistanin lindor vranë 46 persona, kryesisht gra dhe fëmijë, tha të mërkurën një zyrtar i qeverisë talebane. Hamdullah Fitrat, zëvendës zëdhënësi i talebanëve, tha se gjashtë persona u plagosën gjithashtu në provincën Paktika në kufi me Pakistanin.

Qeveria talebane denoncoi sulmin, duke thënë të martën se shumica e viktimave ishin refugjatë nga rajoni Uaziristan dhe premtoi hakmarrje. Zyrtarët pakistanezë të sigurisë, duke folur në kushte anonimiteti në përputhje me rregulloret, i thanë AP se operacioni i së martës ishte për të çmontuar një strukturë trajnimi dhe për të vrarë kryengritësit në provincë.

Ndërkohë, në një deklaratë, Mohammad Khurasani, zëdhënësi i Talibanëve pakistanezë ose Tehreek-e-Taliban Pakistan, pohoi se 50 persona, përfshirë 27 gra dhe fëmijë, kanë vdekur nga sulmet. TTP është një grup më vete, por edhe një aleat i ngushtë i talebanëve afganë, të cilët morën pushtetin në Afganistan në gusht 2021.

Pakistani nuk ka komentuar mbi sulmet. Megjithatë, të mërkurën, ushtria pakistaneze tha se forcat e sigurisë vranë 13 kryengritës në një operacion të bazuar në inteligjencë në Vaziristanin Jugor në Pakistan, një qark i vendosur përgjatë kufirit me Paktika.

Sulmet ka të ngjarë të rrisin më tej tensionet midis dy vendeve. Në mars, Pakistani tha se sulme të bazuara në inteligjencë u zhvilluan në rajonet kufitare brenda Afganistanit./Yahoo.com/