Fitore që afron me Champions dhe saldimi i një miqësie të prishur. Inter jeton gjithçka në transfertën kundër Frosinones duke marrë tri pikë të tjera të rëndësishme në suksesin 3-1. Zikaltërit e drejtuar nga Luçiano Spaletit nuk e vunë asnjëherë në diskutim sfidën, teksa kaluan shpejt ne epërsi me goditjen me kokë të Naingolan në minutën e 19-të.

Në të 37-ën vjen momenti më i rëndësishëm i sfidës. Inter fiton një 11-metërsh. Ikardi shpejton të godasë, por Perisiç i merr topin. Asnjë polemikë nga sulmuesi argjentinas, që pas golit të kroatit është i pari që feston bashkë me “rivalin” e tij në dhomat e zhveshjes. Kaq për pjesën e parë, ndërsa pas pushimit vendasit u kthyen në lojë me Kasatën që ngushtoi diferencat. Por shpresat e Frosinones për të dalë me pikë u shuan në minutën e tretë shtesë, kur Vesino vulosi fitoren e Interit që forcon pozitat në vendin e tretë të renditjes.

E fortë ndërkohë është gara për vendin e katërt, që jep edhe biletën e fundit për në Champions. Për momentin i favorizuar është Milani, që me një 11-metërsh të kthyer në gol nga Kesi fitoi 1-0 kundër rivalëve direktë të Lacios. Por kuqezinjtë nuk duhet të jenë të qetë.

Roma ka gjetur serinë pozitive me fitoren e dytë radhazi, atë kundër Udinezes të sigluar nga goli i realizuar nga Edin Xheko.

Me mëndjen te Champions, Juventus i lejoi vetes të shtyjë festën e titullit me humbjen 2-1 në fushën e Spalit. “Zonja e Vjetër” zbriti në fushë me shumë lojtarë nga skuadra e të rinjve, një detaj që ka sjellë shumë polemika, deri tek akuzat për falsifikim të kampionatit.

Si dhuratë e ka pritur humbjen e kryesuesëve Napoli. Skuadra e Ançelotit bëri detyrën ndaj Kievos duke fituar 3-1 për të ngushtuar diferencën në vendin e dytë tëv renditjes. Titullar në këtë sfidë ishte sërish Elseid Hysaj që bëri një paraqitje në nivelin e skuadrës së tij.
(balkanweb)