Një atentat me armë zjarri tronditi Vlorën mbrëmjen e sotme. Nga të shtënat ka mbetur i plagosur rëndë 30-vjeçari Kevin Hajrulla dhe një kalimtar i rastit. Në pamjet e siguruara nga BalkanWeb dhe News24 shihen momentet pak pas atentatit me breshëri arme zjarri. Në xhamin e makinës ku ndodhej Hajrulla duken gjurmët e predhave të plumbave.

Plumbat kanë kapur edhe kalimtarin e rastit Armand Spahiu, 35 vjeç.

Policia bën me dije se më pas dy personat e plagosur janë transportuar menjëherë në Spitalin Rajonal Vlorë dhe ndodhen nën kujdesin e mjekëve.

Gjithashtu thotë se, gjatë krehjes së zonës në afërsi të fshatit Panaja, është bërë i mundur lokalizimi i automjetit të dyshuar të përdorur nga autorët, i cili është përfshirë nga flakët.

Çfarë thotë policia

Mbrëmjen e sotme, rreth orës 21:30, në lagjen “24 Maji”, Vlorë, në rrethana ende të paqarta, është plagosur me armë zjarri shtetasi K. H., rreth 30 vjeç, i cili udhëtonte me një automjet tip “Benz”. Si pasojë e të shtënave, është plagosur me armë zjarri edhe shtetasi A. S., 35 vjeç, i cili ndodhej në afërsi në momentin e ngjarjes.

Të dy personat janë transportuar menjëherë në Spitalin Rajonal Vlorë dhe ndodhen nën kujdesin e mjekëve.

Gjatë krehjes së zonës në afërsi të fshatit Panaja, është bërë i mundur lokalizimi i automjetit të dyshuar të përdorur nga autorët, i cili është përfshirë nga flakët. Po punohet për shuarjen e zjarrit.

Shërbimet e Policisë kanë mbërritur menjëherë në vendngjarje dhe po punojnë intensivisht për identifikimin dhe kapjen e autorit/autorëve të dyshuar.

Grupi hetimor po vijon punën për zbardhjen e rrethanave të plota të ngjarjes.

(BalkanWeb)