TIRANË- Ministri i Bujqësisë i Bujqësisë, Zhvillimit Rural dhe Administrimit të Ujërave, priti gjatë ditës së sotme, dy delegacione, nga Ministria e Bujqësisë së Turqisë dhe një nga Dhoma e Tregtisë së Sllovakisë.
Ministri i Bujqësisë, Edmond Panariti, kërkoi nga delegacioni turk ndihmë për indeksimin e çmimeve të produkteve bujqësore, si dhe i njohu ata me hapin e hedhur së fundmi nga Ministria e Bujqësisë së Shqipërisë, për krijimin e Bursës së Lushnjës për produktet bujqësore.
Panariti kërkoi edhe mbështetjen e Turqisë për certifikimin e farërave e fidanëve, për krijimin e Fondit të Farërave e Fidanëve, me qëllim mbrojtjen e atyre autoktonë shqiptarë, si dhe për bashkëpunim të konsolidimit të programeve për vaditjen dhe kullimin.
Ministri hodhi idenë e hartimit të një strategjie të përbashkët mes dy vendeve për parandalimin dhe luftimin e sëmundjes së gjedhit, LSD, duke qenë së ky virus erdhi pikërisht nga vendet e lindjes.
Delegacioni nga Ministria e Bujqësisë së Turqisë u shpreh optimist për mbështetje ndaj ideve dhe kërkesave të Ministrit Panariti
Ministri Panariti priti në një takim pune edhe një delegacion nga Sllovakia, me përfaqësues nga Dhoma e Tregtisë së Sllovakisë dhe Ambasada sllovake në Tiranë
Panariti iu prezantoi sllovakëve një pasqyrë të qartë të situatës së zhvillimit të bujqësisë dhe blegtorisë në vend, si dhe i vuri në dijeni ata për produktet dhe sasitë që aktualisht eksporton Shqipëria, për të cilat, delegacioni shprehu interes.
Sllovakët u shprehën se, importi në vendin e tyre, i produkteve bujqësore e blegtorale është me shumë interes, pasi, sipas tyre, prodhimet shqiptare janë mjaft cilësore, si dhe shumë më afër në distancë, sesa nga vendet që ata i importojnë aktualisht.
(m.k/BalkanWeb)