GJERMANI- Partia Socialdemokrate e Gjermanisë po përpiqet që për refugjatët nga shtetet e Ballkanit Perëndimor të krijohet mundësia e marrjes së një vize pune. Kjo do t`u mundësonte shtetasve të vendeve të këtij rajoni që të shkojnë në Gjermani përmes një rruge tjetër, jo përmes azilit.
Sipas këtij propozimi, shtetasit e Shqipërisë, Serbisë apo Kosovës do të fitonin një vizë pune në rast se ata sigurojnë paraprakisht një kontratë pune në Gjermani me të ardhura që e kalojnë pagën minimale prej 1460 euro bruto në muaj, shkruan “Finanz.net”.
Këtë propozim e ka bërë publik sot në një konferencë telefonike me kryeministrat e landeve që vijnë nga partia e tij, kryetari i SPD-së, Sigmar Gabriel.
Sa u përket vizave të punës, ato duhet të jepen në numra të kufizuar. Për të realizuar këtë synim të SPD-së nuk nevojitet ndryshim i ligjit, thonë në këtë parti.
Ndërsa, vënia në jetë e propozimit të përmendur mund të bëhet në çdo kohë përmes udhëzimit nga Agjencia Federale për Ndërmjetësim të Punës (BA).
(b.e/BalkanWeb)