Përveç problemeve të mëdha në organikë dhe në lojë, Partizani gjatë këtyre javëve të fundit po bën edhe “dhurata”, që nuk i shkojnë aspak përshtat një skuadre që luan në të tilla nivele dhe që synon titullin kampion, të paktën sipas deklaratave të bëra nga drejtuesit. Vetëm në katër nga shtatë javët e fundit janë “falur” gjashtë gola, për çka padyshim trajneri i ri, Skënder Gega do të duhet të punojë për t’i shmangur dhe përmirësuar.
gega
GAFAT – Kundër Egnatias (java 25) në minutën e pestë, Domgjoni i dorëzoi topin Lushkjes para zonës dhe fantazisti kavajas nuk e pati të vështirë ta kalonte Qirkon me një parabolë. Mbërrijmë te ndeshja me Elbasanin, kur Sembene bën dy ndërhyrje naive ndaj Zhoel në zonë dhe shkakton dy penallti që shndërrohen në gol nga Musta dhe i kushtojnë skuadrës humbjen. Në ndeshjen pasardhëse ndodh një tjetër pasiguri. Këtë herë është Qirko, që bën një dalje të pastudiuar, nuk merret vesh me Sembenen dhe Gruda përfiton, duke rrëmbyer sferën dhe çuar topin në rrjetë për Vllazninë.
Pas një fitoreje dhe një barazimi kundër Skënderbeut dhe Teutës, gabimet u kthyen sërish në humbjen e fundit kundër Dinamos. Ishte sërish Qirko, që këtë herë bën një pasim të gabuar dhe i jep shansin Zabërgjës të shënojë golin e fitores. Në fund ishte Domgjoni, që humbi penallti, megjithëse ky moment nuk meriton të quhet gafë, pasi hyn edhe fati në mes.
LOJA – Gafat kanë qenë prezent, ama nuk mund të themi se Partizani ka luajtur mirë dhe i ka merituar këto pesë humbje në shtatë ndeshjet e fundit. Skuadra është në një kolaps total sa i përket lojës në të gjitha repartet. Mbrojtja është si minë me sahat dhe në çdo moment mund t’i shënosh. Mesfusha është inferiore thuajse ndaj çdo kundërshtari, teksa sulmi duket tërësisht i fikur dhe i ndarë nga e gjithë pjesa tjetër e skuadrës. Ky Partizan, me atë që po tregon, duhet t’u falet pikëve të mbledhura në gjysmën e parë të sezonit, sepse me atë që ka dhuruar në të dytë, vendin e katërt nuk e meriton.
PRESIONI – Rezultatet negative rëndojnë gjithnjë dhe këtë po e ndjejnë direkt te Partizani. Lojtarët janë shumë “të ngrirë” në atë që bëjnë në fushën e lojës dhe duket se kanë frikë të marrin përsipër. Presion pa dyshim ka edhe te trajneri Skënder Gega, që në një kohë të shkurtër do të duhet të përmirësojë një skuadër të rënë psikologjikisht, por edhe sportivisht.
