Nga: Mariglen MERTIRI
TIRANE- 514 nxënës në shkollën 9-vjeçare “Niko Hoxha” në Valias të Kamzës këtë të hënë nuk mundën të zhvillonin dot mësim për shkak të kushteve të këqija ku shkolla kishte përfunduar nga reshjet e shiut. Uji nga tarraca depërtoi në çdo klasë ndërsa lagështira në mure provokoi një shkëndijë elektrike e cila u finalizua me djegien e llambave.
Fëmijët e Valiasit si ditë pushimi zgjodhën të argëtoheshin duke luajtur edhe ndonjë lojë bilardo teksa treguan edhe arsyet se përse nuk ndodheshin në mësim.
“Shkolla u anulua”,- thotë njëri prej nxënësve.
“Ditën e enjte është bërë një shkëputje telash këtu dhe ka bërë masë”,- sqaroi një tjetër.
“Nuk shkova në shkollë se ka ujë dhe ka pasur masë”, – thotë një tjetër nxënës që mban stekën e bilardos në dorë.
Drejtori i shkollës së bashku me stafin u angazhuan që situata të ndryshojë në favor të nxënësve edhe pse e di se shkolla kërkon ndërhyrje emergjente për shkak të rrezikshmërisë që paraqet në rrjetin elektrik dhe lagështirën që e ka pushtuar.
“Situata ishte mjaft e keqe, për të mos rrezikuar jetën e nxënësve pezullova edhe mësimin. Si rezultat i lagështirës së madhe në pikën e bashkimit të dy godinave ndodh një shkëndije elektrike që dogji edhe dritat e vjetra. Rrjeti elektrik është mjaft i dëmtuar”,- tha drejtori Bukurosh Hoxha.
Drejtori Bukurosh Hoxha beson se mësimi do të rifillojë të martën duke e nxjerrë këtë shkollë momentalisht nga harta e shkollave problematike, megjithëse situata vijon të mbetet e pafavorshme për fëmijët që do ta popullojnë.
“Mendojmë që nesër do të nisë procesi mësimor, që të mos kemi më probleme”,- shtoi ai.
Zona e Valiasit ishte ndër të parat që u prek nga vërshimi i ujërave nga reshjet e shumta në pak orë duke mos kursyer as institucionet e dijes.
(m.a/BalkanWeb)